د ټولگټو وزارت وايي، د هېواد په یو شمېر ولایتونو کې د وروستیو وروښتونو او سېلابونو له امله رسوبي مواد د سړکونو سطحې ته راپورته شوي، چې اوس یې د پاکولو چارې روانې دي.
له یاد وزارت څخه په خپره شوې خبرپاڼه کې ویل شوي، د بغلان سربېره په کندوز او سمنگان ولایتونو کې هم د دوی ټیمونه په کار بوخت دي او هغه لویې لارې پاکوي چې د وروستیو سېلابونو او ورښتونو له امله زیانمنې شوې دي.: «ټولگتو وزارت تل هڅه کوي چې په هر حالت کې د هېوادوالو د سر او مال په خوندي ساتلو او ژغورلو کې نه ستړې کېدونکې همکاري وکړي.»
په خبرپاڼه کې ویل شوي، د وروستیو ورښتونو او سېلابونو له امله په بغلان، غور، سرپل، کاپیسا او سمنگان ولایتونو کې رسوبي مواد د سړک سطحې ته راپورته شوي دي، چې خلک یې د تگ راتگ پر مهال له ترافیکي ستونزو سره مخ کړي دي.
د خبرپاڼې له مخې، د وروستیو وروښتونو له امله په غور کې د چهارصدې او مرغاب ولسوالیو مسیرونه د لنډمهال لپاره تړل شوي وو، چې اوس یې د پاکولو کار پیل شوی دی.:«همدارنگه د تخار د تخار – کلفگان او تخار – فرخار مسيرونو کې د ورستیو ورښتونو په ترڅ کې غر ښویېدنه را منځ ته شوې وه چې په دغو مسیرونو کې یې ترافیکي خنډونه رامنځ ته کړي وو، چې د حل په موخه یې کار روان دی او دغه راز د نورستان د منډول ولسوالۍ مسیر د غرښویدنې له امله موقتاً بند شوی دی چې د پاکولو چارې یې پیل شوې دي.»
له تېرو دوو میاشتو راهیسې په هېواد کې پرلهپسې ورښتونه ورېږي، چې له امله یې زرگونه خلکو ته ځاني او مالي زیانونه اړولي او هم یې سلگونه کیلومتره سړکونه ویجاړ کړي دي.