د پاکستان پوځ ته نږدې ادرسونو ویلي، چې د هند د استخباراتو (را) مهم چارواکی اجېټ جان جوشا په دې وروستیو کې په ایران کې دی او په پرله پسې ډول د پاکستان او ایران د ګډې پولې په اوږدو کې په ماندرین، تربت، جوزک، تفتان او دالبلدین سیمو کې له بلوڅ ازادي غوښتونکو ډلو سره پر پاکستاني پوځ د بریدونو لپاره ناستې او ملاقاتونه لري.
دغو ادرسونو د هند د استخباراتي ادارې یاد چارواکي ته د «دوهم کلبوشن» نوم کارولی او د نوموړي دا ناستې او ملاقاتونه یې د پاکستان لپاره د خطر زنګ بللی دی. جوشا په ۲۰۱۴ کال کې د هند د بهرنیو چارو وزارت د کارمند په توګه له (را) سره یوځای شو. کلبوشن د هند د استخباراتي شبکې(را) مهم جاسوس و، چې په ۲۰۱۶ کال کې پاکستان امنیتي ادارو په بلوچستان کې ونیو. دغه راز هند بیا روانې روژې میاشتې په پیل کې مفتي شاه میر د کلبوشن په نیولو کې د همکارۍ له کبله ترور کړ.
دا څرګندونې داسې مهال دي، چې تېره ورځ هندوکشغږ د پاکستان د استخباراتي ادارې یا آیایسآی دننه د خپلو سرچینو په حواله داسې راپور خپور کړ چې ګواکې پاکستاني استخباراتي اداره د اسرائيلو له استخباراتي ادراې یا موساد سره په ګډه د ایران په زاهدان کې د سپاه پاسداران د ځینو مهمو غړو د ترور پلان لري. د سرچینو په خبره، پاکستاني استخبارات له موساد سره په ګډه، دا کار په بلوچستان کې په وروستیو ناکراریو کې د ایران د لاس لرلو په غچ کې کوي.