محمد فیصل
واک ته د اسلامي امارت له رسېدو وروسته دا دویم ځل دی چې پاکستانی پوځ پر افغان خاوره برید کوي.بیګا چې کوم برید شوی، لکه د تېر برید په څیر په کې ملکي وګړي او بیا ماشومان وژل شوي دي.
کوچني ماشومان په وینو کې لت پت پراته دي. پاکستان فکر کوي چې د دې کوچنیو ماشومانو شهیدانول به افغان حکومت او ولس بې ځوابه پریږدي.
داسې نه ده. افغان پوځ د پاکستاني پوځ ناروا برید ځواب ورکړی او درانه تلفات یې ور اړولي دي.
افغانان د جګړو، خپلواکۍ اخیستو، د یرغلګرو د ځواب او وطن ساتنې اوږد او ویاړلی تاریخ لري.
پاکستان دې لرې نه بلکې دغه نږدې وخت کې شوروي او امریکا ته وګوري، چې افغان ولس یې پر ضد تاریخ جوړوونکې مبارزه وکړه او هغوی یې د ډېر پوځ او وسایلو سربیره مات او سرټیټي له افغانستانه وویستل.
موږ ته د پاکستاني پوځ د تورې تاریخ هم رامالوم دی چې څرنګه یې له هند ماتې خوړلي او څرنګه یې د کشمیر مسلمانان ګټلي دي.
پاکستانی پوځ باید وپوهیږي چې افغانان به یې هیڅ برید بې ځوابه پرینږدي.
افغانانو چې شوروي او امریکا له هغومره ځواک سره تیښتې ته اړ کړل، نو پاکستانی پوځ ورته هیڅ هم نه دی.پاکستان دې په خپل اتوم او الوتکو نه نازیږي.
هغه وسله چې بې ګناه مسلمانان په نښه کوي او د کشمیر او فلسطین مسلمانان ساتلی نه شي، پاکستانی پوځ هیڅکله نشي ساتلی.
د ملي دفاع وزارت له لوري ننني ځوابي بریدونو به پاکستانی پوځ پوه کړی وي چې افغانان څه ډول جګړه کوي او څه ډول په کمو امکاناتو له خپل ناموس دفاع کولی شي.افغان حکومت دې هیڅ تشویش نه کوي.
ولس یې لکه تېر په څېر تر څنګ ولاړ دی او د خپلې خاورې څخه د دفاع له پاره به له دوی سره اوږه په اوږه د یرغلګرو او بریدګرو پر ضد جګړه کوي. ان شاءالله