خبر:
اوراسیا نشریې په خپل تازه تحلیل کې ویلي، چې د طالبانو مشر په تېرو دریو کلونو کې د خپل حکومت دننه د واک کنټرول د پام وړ ډېر کړی دی؛ په دغه تحلیل کې وړاندې راغلي، چې ملا هبت الله اخندزاده په کندهار کې له خپل دفتر څخه ټولې حکومتي چارې او تګلارې پلي کوي.
د دغه تحلیل له مخې، د طالبانو مشر په کلیدي بستونو هغه ته نږدې کسان ګومارلي او په خبره یې، چې د نوموړي له امر پرته هېڅوک خپلسري نه شي کولی.
په تحلیل کې د افغانستان په شمالي ولایتونو سربېره، یو شمېر نورو ولایتونو ته هم د هغه سفرونو ته اشاره شوې او ویل شوي چې طالبان هڅه کوي د خپلې ټولنې د قومي جوړښتونو ملاتړ هم له ځانه سره ولري.
د سرچینې په خبره، د طالبانو مشر هڅه کوي چې خپل حکومت له هر ډول خپلمنځي اختلافاتو لېرې وساتي او نه غواړي چې په کندهار کې متمرکزه رهبري دې یې د اختلافونو ښکار او ترې اغېزمنه شي.
تبصره:
په افغانستان کې د تېرو څو لسیزو سیاسي اړو دوړ، د بېلابېلو واکمنیو خپلمنځي اختلافونو، جګړو او کشمکشونو برعکس، د طالبانو د تېرې واکمنۍ، شل کلنې مبارزې او اوسنۍ درې کلنۍ واکمنۍ پر مهال واحدې رهبرۍ او له دې رهبرۍ د بشپړې پيروۍ او اطاعت مسئلې نړۍ تل له سرګردانه حالت سره مخ کړې ده.
له همدې کبله کله یو ډول او کله بل ډول تحلیلونه کوي، کله دا رهبري د افغانستان له تېرو نورو نظامونو او واکمنیو سره پرتله کوي او کله نا کله خو بیا وايي چې طالبان خپلمنځي اختلافونه پټ ساتي، دوی ته دغه حالت ډېر مرموز برېښي او له همدې کبله خو یې په دې اړوند نږدې ټول تحلیلونه ناسم راوځي.
نړیوال ډېری وختونه د طالبانو واکمني او په دوی کې د واحدې رهبرۍ او ترې د پيروۍ چاره یا له تېرو شاهي حکومتونو سره پرتله کوي، یا یې د خلقیانو او پرچمیانو د وخت له واکمنیو سره، یا د امریکا تر مشرۍ لاندې له تېرې ډیموکراتې واکمنۍ سره او کله ناکله، خو یې د سیمې او نړۍ له حاکمو نظامونو او سیستونو سره هم پرتله کوي، خو د دوی دا پرتلنې او په دې اړوند شته وړاندوینې ټولې ناسمې، له واقعیت لرې او تېر ایستونکي راوځي.
له همدې کبله دې چارې دوی له یو ډول مرموز حالت سره مخ کړي، ځکه دوی د دې پر ځای چې پر اصلي او واقعي ځایونو تمرکز وکړي، تر ډېره پر خیالي خبرو، ناسمو تعبیرونو، غیر واقعي وړاندوینو او تر ډېره تبلیغاتو تمرکز کوي چې دا ټول مسایل له عیني واقعیتونو ډېر لېرې دي.
دوی کله نا کله هڅه کوي چې په دې ډول تحلیلونو، تعبیرونو او باورونو سره دا واحد صف او واحده رهبرۍ نوم بدې او رښتیا ووېشي، خو دوی په دې چاره کې هم ناکام دي.
دوی د تېرې شل کلنې مبارزې پر مهال هم د مستقیمې نظامي، فرهنګي، سیاسي او اقتصادي جګړې ترڅنګ دا هڅه هم کوله چې د طالبانو واحد صف، سالمه او واحده رهبري وېشلې، پاشلې او په عامه اصطلاح له اختلافونو او کشمکشونو ډکه وښيي، خو دوی هر ځل په دې هڅه کې ناکام راوځي.
له تېرو دریو کلونو راهیسې غربي میډیا د نور پروپاګند او رواني جګړې ترڅنګ تل هڅه کړې چې دا مسئله هم خلکو او نړۍ ته لویه وښيي، خو له ټولو هڅو سره سره، د دوی دا هر څه ناسم راوځي، هڅې یې بې پایلې کېږي او هېچا ته پرې قناعت نه شي ورکولی، ځکه عیني واقعیتونه ۳۶۰ درجې توپیر لري؛ عیني واقعیتونه نه شي بدلولی، نو هر څه یې بې پایلې پاتې کېږي.
د اور اسیا او نورو نړیوالو رسنیو او تبلیغاتي مرکزونو دا پروپاګند او تحلیلونه ځکه ناسم او ناکام دي چې دوی د طالبانو رهبري د غني او عبدالله له واکمنۍ سره پرتله کوي، دوی ځکه ناکام دي چې د خپلواکې او ناخپلواکې رهبرۍ توپیر ترې ورک دی؛ دوی ځکه ناکام دي چې عیني واقعتیونه یې له پامه غورځولي.
د طالبانو رهبري او له رهبرۍ یې اطلاعت ځکه پولادي دی چې پر پولادي ایډیالوژۍ ولاړ دی، دوی رهبري امتیاز نه، بلکې ستر مسوولیت بولي، دوی اطاعت او پیروي د دین له اصلي او اساسي ارکانو بولي؛ دوی معنویات او ارزښتونه هېځکله له مادیاتو سره نه برابروي، دوی خپل معنویات او ارزښتونه پر مادیاتو نه معامله کوي، د معاصرې نړۍ د حاکمو نظامونو او سیستمونو خلاف، دوی حکومتولي د ولس او خلکو امانت بولي، له خیانت او شخصي ګټو ځان لېرې ساتي، دوی ته د خپل صف پاک پاتېدل تر هرڅه مهم دي، په دوی کې مشر او کشر معلوم دی او دا قوي دوې اړخیزې پیاوړې اړیکې په قوي تارونو تړلي دي.
ځکه نو د دوی واحد صف نه تبلیغات ماتولی شي، نه د اوراسیا په څېر خیالي او هوايي تحلیلونه او نه هم غربي نړۍ معاصر دجالیت.
دوی ځکه اطاعت او پر رعیت شفقت مهم بولي او دا یې ارزښت ګرځولی، چې دا یې د دین خبره ده، دا یې د ایډیالوژۍ خبره ده، دا یې د پیغمبر خبره ده، دا یې د سپېڅلي قران خبره ده او دا یې د مذهب خبره ده؛ ځکه نو دا ډول تبلیغات او پروپاګند دا پولادي او متینه رهبري او ترې اطاعت نه شي اغېزمنولی.
یادؤنه: په هندوکشغږ کې نشر شوې لیکنې، مقالې او تبصرې یواځې د لیکوالانو نظر څرګندوي، د هندوکشغږ توافق ورسره شرط نه دی.
