د افغانستان د ښځو د سوداګرۍ او صنایعو خونې مشره فریبا نوري وایي، په تېرو پنځو کلونو کې د رسمي سوداګریزو جوازونو لرونکو ښځو شمېر له ۲۴۲۱ څخه شاوخوا ۱۰ زرو ته لوړ شوی دی.
اغلې نوري وایي، له دغو ښځو سربېره شاوخوا ۱۰۰ زره نورې ښځې هم په کلیو او لرو پرتو سیمو کې په لبنیاتو، بڼوالۍ او نورو دودیزو اقتصادي فعالیتونو بوختې دي.
نوموړې زیاتوي چې ښځې په کرنه او لاسي صنایعو کې خپل فعالیتونه پراخ کړي، خو کانونو او ساختماني چارو ته یې لا هم محدود لاسرسی لري او یو شمېر ښځې د انلاین بازارونو له لارې هم فعالیت کوي.
د ښځو د سوداګرۍ او صنایعو خونه وایي، د ښځینه سوداګرو د ملاتړ لپاره یې نندارتونونه، ځانګړي بازارونه، روزنیز پروګرامونه، د لمریزې برېښنا او پورونو د برابرولو چارې ترسره کړې دي.