د معیار او کیفیت ادارې په یوه خبرپاڼه کې ویلي، چې د حیرتان بندر له لارې هېواد ته د واردېدونکو توکو د کیفیت د کنټرول په لړ کې یې، د ودانیزو توکو او بټریو دوې محمولې د معیارونو له نه پوره کولو وروسته بېرته صادروونکي هېواد ته ستنې کړې.
د خبرپاڼې په وینا، په دغو محمولو کې ۴.۵ ټنه مسي سیمونه او ۳۰ دانې بټرۍ شاملې وې، چې د حیرتان بندر د معیار او کیفیت امریت د تخنیکي کارکوونکو له لوري تر تخنیکي ارزونې او اړینو ازموینو وروسته بېکیفیته او له ټاکل شویو داخلي معیارونو سره نامطابقې وپېژندل شوې.
د خبرپاڼې د مخلوماتو له مخې، یاد توکي د هېواد بازارونو ته نه دي پرېښودل شوي او د قانوني کړنلارې له مخې بېرته صادروونکي هېواد ته لېږدول شوي دي.
خبرپاڼه کې راځي، چې د هېواد په سوداګریزو بندرونو کې د وارداتي توکو د کیفیت د ارزونې او کنټرول بهیر ته دوام لري، ترڅو د بېکیفیته او غیرمعیاري توکو د ورود مخه ونیول شي او د مصرفکوونکو روغتیا، خوندیتوب او باور خوندي پاتې شي.