خبر:
د راپورونو له مخې، د عمران خان په مشرۍ د تحریک انصاف ګوند لسګونه زره پلویانو له بېلابېلو ایالتونو، د دغه هېواد د پلازمېنې اسلام اباد پر لور حرکت پیل کړی دی. لاریون والو له بنده د عمران خان د خوشي کېدو په ګډون د یو شمېر نورو غوښتنو لپاره دا لاریون پیل کړی دی. دوی ویلي، تر هغې به خپلو لاریونو ته دوام ورکوي چې ټولې غوښتنې نه وي منل شوې.
بل خوا پاکستاني حکومت او امنیتي ادارو هم د امنیتي اندېښنو له کبله یو شمېر اقدامات پیل کړي، لویې لارې یې تړلي، د امنیتي ځواکونو شمېر یې ډېر کړی او په یو شمېر سیمو کې یې په ګرځېدو او انټرنېټ محدودیتونه لګولي دي.
تبصره:
د پاکستان حکومت او پوځ په دې وروستیو کې د سختو سیاسي، اقتصادي، امنیتي او ټولنیزو بې ثباتیو له کبله د خپل تاریخ تر ټولو بدي ورځې تجربه کوي. همدا اوس د پاکستان په بېلابېلو ایالتونو او دغه راز د خیبرپښتونخوا او بلوچستان په ډیری سیمو کې د پاکستاني پوځ او د هغوی د وسلوالو مخالفینو تر منځ سختي جګړې روانې دي، چې له کبله یې هره ورځ لسګونو نظامیانو ته پکې مرګ ژوبله اوړي.
له بلې خوا دا هېواد له امنیتي ننګونو سره جوخت، له تر ټولو بې ثباته سیاسي، اقتصادي او ټولنیز حالت سره هم لاس او ګرېوان دی. د هېواد چارې یې پوځي مشرانو په لاس کې اخیستې دي او د عمران خان په څېر لوی سیاسي مخالف یې زنداني کړی دی. د دغه هېواد اقتصادي وضعیت ورځ تر بلې خرابیږي او ترڅنګ یې تازه په یو شمېر سیمو کې فرقه یي او مذهبي جګړو هم زور اخیستی دی.
په پاکستان کې روان حالت ترینګلی او کړکېچن شوی، که د عمران خان د پلویانو غوښتنې ونه منل شي، نو ښایي روان کړکېچ لا پسې ترینګلی شي. دا هر څه د پاکستاني حکومتونو او په ځانګړې توګه د دغه هېواد د پوځ، امنیتي او استخباراتي ادارو د ناسمو پرېکړو، پالیسو او د پردیو پروژو د تطبیق له کبله رامنځته شوي دي.
په پاکستان کې روان حالات د خلکو او حکومت ترمنځ دي، هېڅ بهرني هېواد پر پاکستان دا حالت نه دی راوستی، بلکې له اوږدې مودې راهیسې پوځ او عام خلک په یوه نا اعلان شوې جګړه او اخ و ډب کې بوخت دي. پوځ، حکومت او چارواکي تر ډېره په فساد، رشوت او پر عامو خلکو په ظلمونو کې ډوب دي، خو عام ولس بیا لوږې، ظلمونو، بې عدالتیو، بې ثباتیو او نا امنیو تر پزې راوستی دی.
بلوڅان هم د خپلو حقونو د ترلاسه کولو او له ظلمونو د خلاصون لپاره مبارزه کوي، پښتانه چې هم هلته څه وايي او یا یې ترسره کوي، د خپلو حقونو د ترلاسه کولو او له ظلمونو د خلاصون لپاره یې کوي؛ تر دې ورها خوا چې هر چا هلته وسله را اخیستې د ظلم او بې عدالتۍ خلاف یې را اخیستې ده.
په دغه هېواد کې سیاسي، ټولنیزې او اقتصادي بې ثباتۍ هم له حکومت او پوځ څخه د خلکو د بېزارۍ څرګنده نښه ده. دې ټولو چارو دغه هېواد ته سخت زیان رسولی، په بهر کې یې د یاد هېواد حیثیت ختم کړی او په کور دننه یې ولسي مشروعیت ننګولی دی.
له روان کړکېچه د پاکستان د وتلو او یا لا کړکېچ ته د تګ دواړه انتخابه د دغه هېواد له پوځ او سیاسي مشرانو په لاس کې دي. که دوی له خپل ولس سره روان ظلمونه دروي، حقونه یې ورته ورکړي، د دوی د وژنو او رټلو روانه لړۍ ودروي، د غربي هېوادونو له خوش خدمتۍ راووځي او خپل ملت را پخلا کړي، دا هېواد له روان کړکېچه وتلی شي، خو که هر څه برعکس روان وي او د تېر په څېر د هرڅه پړه پر نورو اچوي، د دغه هېواد روان حالت به لا پسې ترینګلی او داسې کړکېچن کړي، چې ترې وتل به ورته ګران وي.
یادؤنه: په هندوکشغږ کې نشر شوې لیکنې، مقالې او تبصرې یواځې د لیکوالانو نظر څرګندوي، د هندوکشغږ توافق ورسره شرط نه دی.
