محمد فیصل
د روسیې په پلازمېنه مسکو کې د تیرې مارچ میاشتې په ۲۲ مه خونړی برید وشو. هغه برید کې ۱۴۴ تنه ووژل شول او لسګونه نور ټپیان شول.
د برید مسوولیت داعش – خراسان ومانه. په برید کې څلور تنه ښکیل وو. هغوی د تاجکستان اوسیدونکي وو چې ژوندي نیول شوي او اوس ترې څیړنې روانې دي.
د شر و فساد ډلې یا په اصطلاح د مقاومت ډلې مشرانو او ملاتړو یې د دې برید له پاره په ټولنیزو شبکو کې ډیر تبلیغ وکړ. د دوی موخه دا وه چې وښیي دغه برید په افغانستان کې پلان شوی و او روسانو ته داسې فکر ورکړي چې ګنې د افغانستان خاوره د دوی پر ضد کارول شوې ده.
خو د دوی هڅې او تبلیغ هغه مهال ناکام شو او دوی سخت ناهیلي شول چې نه د روسیې ولسمشر ویلادیمیر پوتین او نه د روسیې استخباراتو د افغانستان یا طالبانو نوم یاد کړ.
پوتین په خپله وینا کې دغه کار د بنسټپالو مسلمانانو یاد کړ، خو له اوکراین سره یې د اړیکو لرلو اشارې هم ورکړې.ویل کیږي چې د داعش – خراسان تاجکستاني برید کوونکو د اوکراین په لور د تیښتې هڅه کوله چې د روسي ځواکونو له لوري ونیول شول.
شر و فساد د خپل تبلیغ له لارې هڅه کوله چې ځان روسیې ته نږدې کړي او د افغان حکومت پر ضد یو بهرنی ملاتړی پیدا کړي، خو پوتین او نورو لوړ پوړو روسي چارواکو یې په ګرمو تبلیغاتو یخې اوبه توی کړی او سخت یې غلي کړل.
شر و فساد خو به د روسیې د بهرنیو چارو وزارت هغه اعلان نور هم قهرولي وي چې وایي روسیه په دې اړه فکر کوي چې طالبان د ترهګرو ډلې له لست څخه وباسي، څو افغان چارواکي په ازادنه ډول روسیې او د منځنۍ اسیا هیوادونو ته تګ راتګ وکړي.
شر و فساد په دې تمه دی چې کوم بهرنی ملاتړی ومومي تر څو یو ځل بیا واک ترلاسه کړي، خو دا ارمان به یې هیڅکله پوره نه شي.
شر و فساد په افغانستان کې یوه نه بلکې څو تجربې ورکړي چې نور یې هیڅ ریښتینی افغان په واک کې لیدل نه غواړي.دا ځل یې پوتین د مسکو له برید وروسته په خپلو څرګندونو سره د واک ترلاسه کولو وروستۍ هیلې هم مړې کړې.
