شېر کړئ Facebook Twitter بریښنالیک Telegram WhatsApp د غزې له څه باندې دوه کلنې خونړۍ جګړې وروسته چې د اسرائیلو له لوري د فلسطیني ولس پر وړاندې ترسره شوه او د یادې جګړې په جريان کې تر ۷۰ زره پورې فلسطیني وګړي شهيدان او له بې کورۍ سره مخ شول، اوس هم په دې ساړه ژمي کې د سرپناه ځایونه نه لري او ماشومان یې د یخ باد او باران له کبله ژوند له لاسه ورکوي؛ دا په داسې حال کې چې ټرمپ د «سولې بورډ» په نوم د فلسطیني ولس او اسرائيلو ترمنځ د جګړې ختمولو طرحه وړاندې کړې، دا طرحه اصلاً د امريکايي او اسرائيلي ګټو د خونديتوب لپاره رامنځته شوې وه، ترڅو په فلسطین کې فعال خوځښتونه وځپي.د امريکايي بلاک له لوري د سولې بورډ له رامنځته کېدو څخه هدف د اسرائیلو مشروعیت نړيوال کول، د اسلامي هېوادونو وېشل، پر نورو هېوادونو د اسرائیلي جګړې د مالي لګښتونو وېش، د چین، روسيې او ایران نفوذ کمول شامل دي او هر هغه هېواد چې بورډ ته داخلېږي، عملاً د امريکا په بلاک کې حسابېږي. هېوادونه به په دې بورډ کې د شموليت لپاره يو ميليارد امريکايي ډالر ورکوي، ترڅو په هر حالت کې د بورډ له لوري د ترسره کېدونکو پرېکړو اطاعت وکړي.د پاکستان له لوري د «سولې بورډ» غړيتوب منل تشريفاتي نه، بلکې د اقتصادي مجبورۍ، ستراتيژيکو اړيکو جوړولو او امريکا – اسرائيلو ته د وفادارۍ ښوودلو په معنی ده او ياده پرېکړه یې په داسې حال کې وکړه چې فلسطیني وګړي د نسل وژنې له خونړي جريان سره غاړه غړۍ وو او د مسلمانانو د مرستې په انتظار یې ستوني خپ او اوښکې وچې شوې، خو د مرستې څرک یې په زره بین کې لا نه ښکارېده.پاکستانی پوځي رژیم چې هر وخت ځان د فلسطين او نورې اسلامي نړۍ خواخوږی بولي، د دې ترڅنګ ځینې درباري علماء هم همدا خبره په کلکه کوي، چې د پاکستان پوځ دا اعزاز لري چې پاکستاني پوځیان د حرمین ساتونکي دي او پاکستان د مسلمانانو لومړنی اټومي هېواد دی، په داسې حال کې چې د سولې بورډ تر نامه لاندې به په فلسطین کې، د فلسطیني وګړو او هلته فعالو خوځښتونه پر وړاندې د اسرائیلي عسکرو سره اوږه پر اوږه د اجرتي قاتلانو رول لوبوي او په فلسطین کې به د اسرائیلو له لوري د روانې نسل وژنې تسلسل ژوندی ساتي.هند سره له دې چې له اسرائیلو سره ښې او ژورې اړيکې لري، خو په یاد بورډ کې یې له ګډون څخه انکار وکړ، ترڅو خپل استقلال وساتي او دا یې هم شاید انګېرلې وي چې په ياد بورډ کې غړيتوب اخیستل به په نړيواله کچه د هند پر وړاندې د مسلمانانو حساسيتونه را وپاروي او په راتلونکي کې به هند ته سرخوږی جوړ کړي.د پاکستان امنيتي وضعيت چې له څه مودې راهیسې له ننګونو سره مخ دی او پوځیان یې د امنیتي وضعیت په مهارولو کې پاتې راغلي دي، نو د پوځ درباري علماوو لکه طاهر اشرفي، مفتي عبدالرحیم او نورو په هره غونډه او مرکه کې هند – اسرائیل – افغانستان یو متحد مثلث بولي، چې دا ادعا تل د پاکستان د داخلي سیاست، د پوځ د برلاسۍ او د ولس د ذهني انحراف لپاره په ډېره بې شرمۍ سره کاروي، خو په یاد بورډ کې د پاکستان شموليت دا په ډاګه کړه چې د درباري علماوو حیثیت تل تر دې ټيټ وي او د يو څو پيسو په مقابل کې د باطل لپاره قرآني آيتونه تحریفوي او باطل ته د حق جامه ور اغوندي.افغانستان چې تقریباً له نیمې پېړۍ جګړې وروسته یې د آرام ساه واخیسته او ټپونه یې لا هم ژور ديؤ خو بیا یې هم د اسرائیلي تېري پر وړاندې د فلسطيني ولس د مشروع غوښتنو او مبارزې ننګه کړې او بار بار یې په خپلو اعلاميو کې د هغوی قربانۍ او مبارزه ستايلي دي، د روانې نسل وژنې پر وړاندې یې غږ پورته کړی او د فلسطیني ولس ترڅنګ یې د درېدو او همکارۍ ډاډ ورکړی دی.د ټرمپ له لوري د «سولې بورډ» د شموليت لپاره په مسوده کې يو میلیارد ډالر ښودل شوي دي، يعنې هر هغه هېواد چې غواړي په یاد بورډ کې غړيتوب ترلاسه کړي، نو باید يو میلیارد ډالر مخکې له مخکې ورکړي، خو مهمه دا ده چې پاکستان له آی ایم ایف، چین او نورو عربي هېوادونو په میلیاردونو ډالره پوروړی دی او د یاد پور د ورکولو توان نه لري، نو څنګه کولای شي چې د سولې بورډ د شموليت لپاره يو ميليارد ډالر ورکړي؟څه موده وړاندې چې د پاکستان د پوځ مشر عاصم منیر او لومړي وزير امريکا ته رسمي سفر ترسره کړ، له ټرمپ سره یې له نږدې ملاقات وکړ، د هغه ملاقات په جريان کې د امریکا ولسمشر ته د عاصم منیر له لوري په ځانګړي بکس کې قیمتي غمي وړل شوي وو، ترڅو ټرمپ دې ته وادار کړي چې په پاکستان کې امريکايي شرکتونه د پښتونخوا او بلوچستان د معدنياتو په را ويستلو کې سهیم کړي؛ داسې انګېرل کېږي چې د سولې په بورډ کې د غړیتوب لپاره د پښتونخوا او بلوچستان پر معدنياتو معامله شوې او په بدل کې یې ټرمپ د سولې په بورډ کې پاکستان ته غړيتوب ورکړی دی.دا ډول پرېکړه د پاکستان د حاکم نظام لپاره يوه تاريخي او اخلاقي ازموينه وه چې له بده مرغه د شخصي واک د دوام لپاره یې د اسرائيلي رژیم ملګرتيا غوره او د بې وسه مسلمان هېواد په وړاندې یې د درېدو فیصله وکړه. پاکستاني پوځي رژیم وښوده چې د پاکستان حاکم پوځي رژیم هېڅ ډول اخلاقي، انساني او اسلامي ارزښتونو ته ژمن نه دی او د خپلې بقاء لپاره هر ډول جوړجاړي ته تيار دی.یادؤنه: په هندوکشغږ کې نشر شوې لیکنې، مقالې او تبصرې یواځې د لیکوالانو نظر څرګندوي، د هندوکشغږ توافق ورسره شرط نه دی.
