د پکتیکا د ټولگټو چارو ریاست مسوولین وايي، د دغه ولایت د زېړوک ولسوالۍ څخه تر د خوست تر سپېرې ولسوالۍ پورې د غځېدلي سړک چارې بیا پیل شوې دي.
د پکتیکا د ټولگټو چارو رئیس محمد اکبر عادل وايي، د یاد سړک چارې یو کال وړاندې پیل شوې وې؛ خو د سختو ډبرینو غرونو پرې کولو له امله یې کارونه یو څه ځنډېلي وو.
دی وايي، د یاد سړک چارې د کورنیو چارو د چارسمبالي وزیر خلیفه سراجالدین حقاني په مالي لگښت پیل شوې او ډېر ژر به یې چارې بشپړې شي.
د عادل په خبره، د قراردادي شرکت مسوول ته لارښوونه شوې، چې خپلې چارې په ښه ډول پرمخ یوسي او د ستونزو پر مهال د ټولگټو چارو ریاست خبر کړي.
پکتیکا یو غرنی ولایت دی، چې ډېرې برخې یې غرونو پوښلې دي. یاد ولایت گڼې ولسوالۍ د ډیورنډ فرضي کرښې سره نږدې پرتې دي.
