یو شمېر رسنیو خبر ورکړی، چې چارلس براون اسرائیلو ته خبرداری ورکړی، چې حزب الله سره جګړه خطرناکه ده.
د امریکا د پوځ د لوی درستیزانو د کمېټې مشر جنرال “چارلس براون” اسرائیلو ته خبرداری ورکړی، چې حزب الله سره پوځي مخامخ کېدل؛ جګړې ته د ایران د رابللو په مانا ده او باید مخنیوی یې وشي.
نوموړي حزب الله سره جګړه خطرناکه بللې، زیاته کړې یې ده، چې ښايي امریکایي ځواکونه بیا د دغې جګړې په کابو کولو کې مرسته ونه شي کړای.
وروسته له هغې د حزب الله او اسرائیلو تر منځ د جګړې لمن د پراخېدو په اړه راپورونه خپاره شول، چې اسرائیلي الوتکو د لبنان په سویل کې ځینې موخې په نښه کړې او د حزب الله یو جنګیالی یې و واژه؛ ویل کیږي، چې دغه جنګیالی په “جواییه” سیمه کې د دې ډلې د عملیاتو قومندان و، حزب الله هم د نوموړي وژل کېدل منلي دي.
اخوا د حزب الله مشر “سید حسن نصرالله” د تېرې چهارشنبې په ورځ ګواښ کړی و، چې د جګړې په صورت کې به په اسرائیل کې هیڅ ځای خوندي پاتې نشي او ان قبرس او د مدیترانې نورې برخې به هم له خطر سره مخامخ شي.
پر غزې تړانګې د اسرائیلو د یرغل را پدیخوا حزب الله له خپل فلسطیني متحد حماس سره د همکارۍ د څرګندولو لپاره پر اسرائیلو توغنديز بریدونه کوي، چې په اسرائیل کې یې په لسګونو زره کسان د کورونو پریښودو ته اړ کړي دي.
اسرائیل هم د حزب الله د ځپلو لپاره د لبنان په ځینو سیمو وخت نا وخته بریدونه کوي، چې له امله یې ګڼ شمیر لبنانیانو خپل استوګنځي پريښي او نورو سیمو ته ګډوال شوي دي.
