د افغانستان د اوسپنې پټلۍ اداره وايي، یو چینايي شرکت چمتو شوی په هرات کې د اوسپنې پټلۍ په برخه کې پانگونه وکړي.
له یادې ادارې څخه په خپره شوې خبرپاڼه کې ویل شوي، د هرات د اوسپنې پټلۍ رئیس محمد نیسم محمدي(یون لونگ زیرن) چینايي شرکت استازو سره لیدلي او د اوسپنې پټلۍ په برخه کې یې پانگونې ته هڅولي دي.
د خبرپاڼې له مخې، د هرات د اوسپنې پټلۍ رئیس ویلي، اوسمهال افغانستان په ځانگړي ډول هرات کې د کانونو او د استخراج او پروسس ترڅنگ د اوسپنې پټلۍ په برخه کې چینايي پانگهوالو ته د پانگونې لپاره غوره فرصتونه شته او چینايي پانگهوال باید له دې مهم فرصت څخه گټه واخلي او په دې برخه کې پانگونه وکړي.
په خبرپاڼه کې د (یون لونگ زیرن) استازي له قوله ویل شوي، د اوسپنې پټلۍ پراختیا د سیمې او نړۍ لپاره مهمه ده او افغانستان د نښلولو لپاره بنسټیزه کیلي ده.: «په افغانستان کې د اوسپنې پټلۍ په برخه کې پانگونه يې لومړيتوب دی او ياده موضوع به د دې شرکت له مشرتابه سره هم شريکه کړي.»
د يادونې وړ ده، چې د ياد شرکت استازي هرات ولايت ته د فولادو د توليد په برخه کې د ۳ مېليونه امريکايي ډالرو په ارزښت د يوې پروژې د سروې په موخه سفر کړی وو، چې وروسته به د پانگونې دا کچه تر ۱۰۰ مېليونه امريکايي ډالرو پورې لوړوي.
د یو بل خبر له مخې، د اوسپنې پټلۍ له لارې تېره اوونۍ ۹۲۲۳۳ مټریک ټنه توکي لېږدول شوي دي. یادې ادارې په خپله خبرپاڼه کې ویلي، د حیرتان اوسپنې پټلۍ له لارې (۷۵۶۹۸) ټنه، د آقینې اوسپنې پټلۍ له لارې (۵۰۵۴) ټنه او د تورغونډۍ اوسپنې پټلۍ له لارې (۱۱۴۸۱) ټنه انتقالات چې ټولټال (۹۲۲۳۳) ټنه نفتي، غیر نفتي او نور مواد دي، هېواد ته وارد او صادر شوي دي.