کابل ښاروالۍ مسوولین وايي، په ۲۱مه ناحیه کې یې ۲ټنه بېکیفیته توکي راټول کړي او د له منځه وړلو په موخه یې ټاکلي ځای ته لېږدولي دي.
له کابل ښاروالۍ څخه په خپره شوې خبرپاڼه کې ویل شوي، له بازارونو څخه د څارنې په لړ کې یې دوه ټنه بېکیفیته خوراکي او ناخوراکي توکي چې د مصرف نېټه یې هم پای ته رسېدلې ده راټول کړي او د له منځه وړلو په موخه یې ټاکلي ځای ته لېږدولي دي.: «په دغو توکو کې شېدې، ملايي، بیسکویټ، غوړي، پنېر، اچار، مصاله، د رومي بانجانو روب، چپس، پاپړ، غیر الکولي څښاک او د مینځلو توکي شامل دي.»
په خبرپاڼه کې له ټولو پلورونکو غوښتنه شوې، چې د بېکیفیته توکو له پلور څخه ډډه وکړي او ښاریان دې هم د خپلو اړتیا وړ توکو د پېردولو پر مهال د هغوی کیفیت او د مصرف نېټې په جدي توگه گوري.
همدا راز د کابل ښاروالۍ مسوولین وايي، د څوارلسمې ناحیې اړوند د پغمان په ۲۱م گذر کې د قلعه سرور سیمې د سړک کانکرېټ کولو چارې چې، (۷۵۰) متره اوږدوالی او (۴) متره سور لري، (۸۰) سلنه مخته تللې دي او تر راتلونکو (۲۰) ورځو به بشپړې او گټې اخیستنې ته وسپارل شي.: «دغه پروژه د کابل ښاروالۍ له خوا او د ملگرو ملتونو د پروژوي خدمتونو د دفتر په مرسته، د ښاریانو د ستونزو د حل او د کاري فرصتونو د رامنځته کولو په موخه طرحه شوې ده.»
په خبرپاڼه کې ویل شوي، کابل ښاروالۍ ښاریانو ته د ښاري او ټولنیزو اسانتیاوو د برابرولو په موخه، له ښاري اسانتیاوو څخه بې برخې او لرې پرتو ناحیو کې ورته نورې پروژې هم پلي کوي.
کابل ښاروالۍ په لنډه موده کې د کابل ښار گڼ سړکونه ورغول، گڼې څلور لارې یې جوړې کړې او زرگونه کسانو ته یې لنډې او اوږدمهاله کاري بوختیاوې هم برابرې کړي دي.