د بهرنیو چارو وزارت د ستراتیژیکو مطالعاتو مرکز په نوښت «د افغانستان–قزاقستان اړیکو کې راټوکېدونکي فرصتونه» تر سرلیک لاندې علمي–څېړنیزه ناسته شوې، چې په کې د قزاقستان د جمهوري ریاست د ستراتیژیکو مطالعاتو انسټېټیوټ مشر دوکتور یرکین توکوموف هم ګډون کړی و.
د معلوماتو له مخې په دې ناسته کې د بهرنیو چارو وزارت د ستراتیژیکو مطالعاتو مرکز رئیس ولي الله شاهین ویلي، چې قزاقستان د سیمې په کچه یو اغېزناک هېواد دی او په خبره یې د سرپرست حکومت اقتصاد محوره بهرني سیاست دا زمینه برابره کړې، چې د سیمې له هېوادونو سره د سوداګرۍ او ټرانزیټ برخو کې د پاموړ فرصتونه او پرمختګونه رامنځته شي.
له بهرنیو چارو وزارت څخه د خپرو شویو معلوماتو له مخې، د قزاقستان ستراتیژیکو مطالعاتو انسټېټیوټ مشر ویلي، چې په افغانستان کې د وروستیو کلونو پرمختګونو د دواړو هېوادونو په اړیکو کې ګڼ فرصتونه ټوکولي او هېواد یې چمتو دی چې له افغانستان سره په بېلابېلو برخو کې خپلو همکاریو ته پراختیا ورکړي.
