بهرنیو چارو وزارت ویلي، چې کابل کې د دې وزارت د ستراتیژیکو مطالعاتو د مرکز په کوربه توب د افغانستان-منځنۍ اسیا او اذربایجان د ستراتیژیکو مطالعاتو مرکزونو د جوړېدونکې سیمهییزې غونډې ګډونوال رارسېدلي او یاده غونډه د مولوي امیرخان متقي پر وینا پیل شوې.
په دې ناسته کې د افغانستان ترڅنګ د اوزبیکستان، ترکمنستان، قزاقستان، قرغیزستان، تاجکستان او اذربایجان هېوادونو د ستراتیژیکو مطالعاتو مرکزونو مشران او پالیسي جوړوونکي ګډون لري.
ویل کیږي غونډه کې به د سیمهییز اتصال، ثبات، سوداګرۍ، انرژۍ، ټرانزیټ، پانګونې او اقتصادي همکاریو په اړه هر اړخیز بحثونه وشي، چې د سیمې تل پاتې ثبات او ګډې هوساینې لپاره به یو نوی فصل پرانیزي.