د کندهار ځايي مسوولین وايي، په کندهار کې د ټوکر جوړولو دوو کارخونو خپلې چارې پیل کړې دي.
د نخي نساجي کارخونې مشر محمد سلیم صابر وايي، په کارخونه کې یې شاوخوا ۳ زره بېلابېل ماشینونه موجود او فعاله دي.د صابر په خبره، له تېرې یوې نیمې میاشتې راهیسې یې فعالیت پیل کړی، چې اوسمهال د ۴۰۰ ماشینونو په فعالیت سره د پنبې څخه عامې روغتیا وزارت ته روغتیايي توکي او هم دفاع او کورنیو چارو وزارتونو او استخباراتو عمومي ریاست ته د نظامي دریشي ټوکرونه هم تولیدوي.:«که نور وزارتونه او اداري ورسره تړونونه وکړي، نو پاتې ۲۶۰۰ ماشینونه به هم په فعالیت پیل وکړي، چې ورسره به په ۲۴ ساعتونو کې ۱۲ زره کسانو ته د کار زمینه برابره شي.»
دی وايي، د نخي کارخونه په کال کې د ۶۶۹۲ ټنه د پنبې د پروسس وړتیا لري او ۴۰ مېلیونه متره ټوکر تولیدولی شي.
له بل لوري د پشمي نساجي کارخونې مشر موسی کلیم بیا د خپلې کارخونې په اړه وايي، چې د هېواد، بهرنیو او مصنوعي وړیو او منسوجاتو ترڅنګ د کرک او منسوجاتو څخه یې د غالیو تار، کشمیره، پټو، شال، کمپلې، شړۍ او نور تولیدات لري، چې د کیفیت له مخې بېساري دي.:«په کارخونه کې یې ۶۴ بېلابېل ماشینونه فعال دي، چې د کال ۱۰۰۰ ټنه د پنبې په پروسس سره یو مېلیون متره ټوکر تولیدولی شي. که چېرته ټول ماشینونه په فعالیت پیل وکړي، په ۲۴ ساعتونو کې ۱۸۰۰ کسانو ته پکې د کار زمینه برابرېږي.»
د یادونې وړ ده، د کندهار نخي او پشمي کارخونې په کال ۱۳۵۴ل کال کې جوړې شوې وې، چې وروسته د کورنیو جگړو او بهرني یرغل پر مهال یې فعالیتونه درېدلي وو؛ خو اوس یې بېرته خپلې چارې پیل کړې دي.
