د کانونو او پټرولیم وزارت وايي، د دغه وزارت چارسمبالي وزیر شهاب الدین دلاور یو افغان اهل هنود پانگهوال چې د کانونو په برخه کې د پانگونې په موخه هېواد ته راستون شوی لیدلي دي.
له یاد وزارت څخه په خپره شوې خبرپاڼه کې ویل شوي، نوموړي د اسلامي امارت د هغې پرېکړې په اړه چې د اهل هنودو غصب شوي ملکیتونه راگرځوي خوښي څرگنده کړه او د افغانستان د کانونو په برخه کې په ځانگړې توگه د سرب، جست، مرمر او ډبرو سکرو د کانونو په برخه کې د پانگونې ټټر وواهه.
د کانونو چارسمبالي وزیر نوموړي ته ډاډ ورکړی، چې د کانونو د پانگونې په برخه کې به ورسره پوره همکاري کوي.:« افغانستان د ټولو افغانانو گډ کور دی، ټول اهل هنود د نورو وگړو په څېر د هېواد د کانونو او نورو ټولو شتمنیو کې برابر شریک دي، اهل هنود پانگهوال د نورو پانگهوالو په څېر کولی شي د اصولو او مقرراتو مطابق د افغانستان د کانونو په برخه کې پانگونه وکړي، د کانونو او پټرولیم وزارت چمتو دی چې په دې برخه کې همکاري وکړي.»
تېره اوونۍ د عدلیې وزارت ویلي وو، د ځمکو د غصب د مخنیوي او د غصب شوو ځمکو د استرداد کمېسیون چې د هېواد په کچه د غاصبینو او زورواکو په واسطې د غصب شوو امارتي ځمکو د بررسۍ، تشخیص او تثبیت مسوولیت په غاړه لري، د اهل هنود هېوادوالو د غصب شوو ځمکو د بررسۍ بهیر د هېواد په کچه پيل کړی دی.
افغان اهل هنود ډېری په هندوستان، انگلستان او کاناډا کې اوسېږي او اوسمهال یې ډېر کم شمېر په افغانستان کې پاتې دي.
