کشنبه/ د وري ۵ مهد روسیې په پلازمېنه مسکو اړوند په کروکوس کې د موسیقۍ په یوه تالار کې د داعـ.ـش د برید له امله د وژل شویو کسانو شمېر ۱۵۰ تنو ته لوړ شوی دی.
یو شمېر رسنیو د روسیې د امنیتي ادارو په حواله راپورونه خپاره کړي او ويلي یې دي، چې په یاد خونړي برید کې نږدې ۱۵۰ تنه نور ژوبل شوي دي.
د روسیې ولسمشر ولادیمر پوتین په یوه ټلویزیوني مرکه کې ویلي، په دغه پېښه کې ټول ښکېل او شکمن وسلوال نیول شوي دي.
نوموړي په خپلو خبرو کې ویلي، چې بریدګر هغه مهال نیول شوي، چې هڅه یې کوله اوکرایین ته وتښتي.
اوکرایین بیا له وړاندې په دغه برید کې خپله ښکېلتیا رد کړې ده او ویلي یې دي، چې یاد برید کې اوکراین هیڅ ډول ښکېل نه دی.
د روسیې ولسمشر ولادمیر پوتین د یادې پېښې له امله نن یکشنبه په ټوله روسیه کې ماتم اعلان کړی دی.
په مسکو کې دا خونړی برید د نورو ګڼو هېوادونو او نړۍوالو سازمانونو ترڅنګ افغان حکومت هم په سختو ټکو غندلی دی.
له برید څخه وروسته لومړنیو مالوماتو پر اساس په برید کې ۶۰ تنه وژل شوي و او تر ۱۰۰ زیات ټپیان و، خو د دغې پیښې له امله د مرګ ژوبلې ارقام مخ په زیاتېدو دي.