د اوبو او انرژۍ وزارت وايي، په هلمند کې د کجکي بند دویم فاز پروژه چې اوسمهال یې د دویمې برخې چارې چې د خدماتي پرچاوي جوړول، د هغې د دروازو نصبول او د اضطراري پرچاوې جوړول پکې شامل دي لس سلنه بشپړې شوې دي.
له یاد وزارت څخه په خپره شوې خبرپاڼه کې ویل شوي، د کجکي بند د دویم فاز د لومړۍ او دویمې برخې د چارو په بشپړېدو سره به د نوموړي بند د اوبو زېرمه کولو وړتیا له یو مېلیارد متره مکعب څخه ۲.۰۲ مېلیارد متره مکعب ته، د اوبولگولو وړتیا له ۱۰۰۰۰۰ هکتاره څخه ۲۷۶۰۰۰ هکتارو ته او د برېښنا د تولید وړتیا به له ۵۱ مېگاواټو څخه ۱۵۱ مېگاواټو ته لوړه شي.:« په یاده پروژه کې گڼ شمېر د سیمې اوسېدونکو ته په مستقیمه او غیر مستقیمه توگه د کار زمینه چمتو شوې ده، چې د چارو په بشپړېدو سره به یې د هلمند او کندهار ولایتونو اوسېدونکي له برېښنا څخه برخمن شي.»
د یو بل خبر له مخې، د اوبو او انرژۍ وزارت د کندهار د ظاهرشاهي کانال د اوبو د وېش ۱۳ دروازې رغولي دي.
د ارغنداب سیندیزې فرعي حوزې مسوولینو کندهار کې د ظاهر شاهي کانال د اوبو د ښه تنظیم، کنټرول او وېش په موخه د نوموړي کانال د اوبو د وېش ۱۳ دروازې ورغولې او یوه نوي دروازه نصب کړه او همدارنگه یې د د ساتنې او څارنې چارې هم تر سره کړې.
دغه کانال د کندهار ښار په گډون څو ولسوالیو ته د اوبو رسولو په برخه کې اړین رول لري او د زرگونو هکتاره کرنیزې ځمکې د خړوبولو وړتیا هم لري.