محمد خوږیاڼی
پاکستان په خپل ۷۷ کلن تاریخ کې د افغانستان خیر نه دی غوښتی. د داود خان د شهادت وروسته پاکستان ته په افغانستان کې د لاسوهنې لاره پرانیستل شوه. د روسیې د یرغل په کلونو کې پاکستان اټوم بم جوړ کړ او زموږ هېواد په بشپړ ډول کنډواله شو.
د امریکا د یرغل په کلونو کې هم پاکستان مېلیاردونه ډالر وگټل. پر افغانستان د طالبانو د بیا واکمنۍ راهیسې پاکستان بیا بېلابېلې پلمې کوي.
کله تحریک طالبان پاکستان رامخکې کړي، کله زموږ د حکومت په استازیتوب په نړیوالو دریځونو خبرې وکړي، کله توغندي راتوغوي او اوس خو وخت ناوخت بمبار هم کوي. داعش(خوارج) هغه ډله ده، چې په ټوله نړۍ کې د امریکا او ملگرو گټې تظمینوي.
داعش سره یوازې د پاکستان استخباراتي اداره لاس نه لري، بلکې د امریکا، انگلستان، اسرائیلو او د نړۍ د هرې پلېتې استخباراتي ادارې لاس ورسره حتماً دی.
دغه ډله په ټوله نړۍ کې یوازې د امریکا او ملگرو د گټو ساتنه کوي او خپل دښمن پرې داړي.
له نن څخه تقریباً دوې میاشتې مخکې د احمد ضیاء مسعود په منځگړیتوب د پاکستان د استخباراتي ادارې(ISI) یو لوړپوړی غړی تاجیکستان ته تللي وو او هلته یې د احمد مسعود او امرالله صالح سره لیدنه کړې وه.
په دې لیدنه کې دوی یوې هوکړې ته رسېدلي وو، چې د شر او فساد ډله به په شمالي او نورو ولایتونو کې مرکزونه جوړوي او په دغه مرکزونو کې به د داعش وسلهوالو ته ځای ورکوي. که داعش د ویجاړۍ کوم کار کوي، نو د دمې ځای به یې د شر او فساد ډلې مرکزونه وي.
هم به له هوايي بریدونو په امن وي او هم به یو پټنځای ولري. په دې لیدنه کې دوی په دې هوکړې ته رسېدلي وو، چې په روان کال کې به په شمالې ولایتونو په لوړو ځایونو او یا هم په ښارونو کې دوی داسې ځایونه برابر کړي، چې کوردینات یې له دوی سره وي، تر څو دوی دغه کوردینات بهرنیانو ته هم ورکړي، چې په هغو ځایونو به بریدونه نه کوي.
دغه هوکړه یوازې د پاکستان د استخباراتي ادارې(ISI) کس، امرالله صالح، احمد مسعود او احمدضیاء مسعود ترمنځ شوې وه او د شر او فساد ډلې نور غړي ترې بېخبره ساتل شوي وو.
د دې ډلې غړی جنرال شاهین نه غواړي چې د دوی په مرکزونو کې دې د داعش وسلهوال واوسېږي او یا دې د دوی له اعاشې او اباطې څخه هغوی ته هم برخه ورکړل شي.
جنرال شاهین د شر او فساد ډلې مشرانو ته ویلي، چې باید د جگړې تگلاره روښانه وي او په هر هغه څه باید پوه کړل شي، چې دوی یې کوي او پټې خبرې او ناستې ورسره نه مني.
نوموړي همدا راز د شر او فساد ډلې ته ویلي، په بعضي سیمو کې ځینو کسانو ته اعاشه ورکول کېږي او امرالله صالح هم په خپل سر خلکو ته وسلې او مهمات ورکوي او بېرته یې حساب نه ورکوي.
د شر او فساد ډلې ترمنځ اوس مهمه موضوع دا ده چې په خپلو خیالي مرکزونو کې داعش ته ځای ورکړي او کهنه؟ له بل لوري دوی د پاکستان استخباراتي ادارې(ISI) سره هم هوکړه کړې اوس یې خپل غړي ترې ناخوښ دي.
پاکستان به په روان کال کې ډېره هڅه وکړي چې د ډیورنډ فرضي کرښې دې غاړې ته د داعش وسلهوال راولېږي. په تېر ژمي کې به یې سلگونه کسانو ته روزنه ورکړي وي او اوس به یې په پسرلي کې دلته رالېږي.
داعش به هڅه وکړي چې د هېواد په ټولو ولایتونو کې غټ او واړه بریدونه وکړي، چې خپل موجودیت د هېواد په ټولو ولایتونو کې وښيي.
خو د شر او فساد ډله کې بیا جنرال شاهین په خپلو لیکو کې داعش نه غواړي او نه هم د دې ډلې د غړو له لوري له استخباراتو ادارو سره پټې او ښکاره ناستې.
امرالله صالح، احمد مسعود او د دې ډلې غړي غواړي چې د پښتنو په سیمو کې د داعش په نامه ډېر فعالیتونه وکړي او په هغه سیمو کې چې تاجیک، ازبېک او نور قومونه اوسېږي هلته د شر او فساد ډلې په نامه خپل فعالیتونه وکړي.
د افغانستان امنیتي ادارې باید ويښې وي او د شر او فساد او داعش ډلې بریدونه په نطفه کې خنثا کړي؛ گنې الله دې نه کوي چې دغه شته امنیت هم خراب شي.