د صنعت او سوداګرۍ وزارت لخوا په غزني ولایت کې د “ګنجینې” په نوم درې ورځنی نندارتون پرانیستل شوی دی.
د دغه وزارت مسوولینو ويلي، چې په دې نندارتون کې ۸۰ غرفې د کورنیو تولیداتو د ودې لپاره ایښودل شوې، چې ۳۲ یې ښځینه سوداګرو ته ځانګړې شوې دي.
د ګنجینې نندارتون په پرانېست غونډه کې د صنعت او سوداګرۍ وزارت مرستیال ویلي، چې صنعت او سوداګرۍ وزارت افغاني تولیداتو ته د بازار موندنې په موخه سږکال د ۵۰ ملي او نړۍوالو نندارتونونو د جوړېدو پلان لري.
نوموړي دغه راز زیاته کړې، چې د کورنیو تولیداتو د ودې لپاره يې د هېواد په بېلابېلو ولایتونو کې نندارتونونه جوړ کړي دي.
د صنعت او سوداګرۍ وزارت وایي، چې د دې نندارتون موخه کورنیو تولیداتو ته بازار موندنه، د ملي صنعت ترویج، له کورنیو تولیداتو څخه د خلکو د استفادې تشویق او د سوداګرو ترمنځ د بازارونو ارزونه ده.