لیکوال: اېمل پښتون
ملګري ملتونه:
د دوی ملګرتیا په یوه نقطه سره راټولېږي، هغه د ابراهیمي ملت پر وړاندې د سنګر نیول دي، دا د ملتونو په نامه داسې یو ګډ واحد کفري ملت رامنتځته شوی، چې یوازې د دوی په وحشي اشر ور ګډ خلک بشر بلل کېږي، هغه که په هر هېواد، سیمه، ژبه یا قوم پورې اړه ولري، دوی یې پالنه کوي او د بشر له حقوقو یې برخمن ګرځوي.
خو برعکس که څوک په ابراهیمي ملت ورګډېږي، هغه که په هر هېواد، قوم، ژبه او سیمه کې وي، د دوی پګړه (اشر) به یې په ګډه مخالفت کوي، هغه که په یو بشپړ هېواد کې یوازې یو کس هم و اوسي، هغه ترهګر، باغي او ترورست یادوي او د بشریت له دایرې څخه یې باسي.
مثلاً: اسرائیل د دوی د ګډ کفري ملت برخه دي، نو په کلکه یې دفاع کوي.
څه موده وړاندې ایران په اسرایلو توغندیز برید وکړ، هلته په اسرائیلو کې د دوی ملت اوسېږي، نو د دغه نړۍوال کفري اشر د (ملګرو ملتونو) د داعیانو لخوا ټول برید په بشپړ ډول په هوا کې شنډ شو، هلته په اسرايیلو کې د دوی بشر (ملت) ته هېڅ زیان وانه وښت، د دوی د بشر له حقوقو په بشپړ ډول دفاع وشوه.
مګر له بلې خوا ملګرو ملتونو ته اجنبي بشر (ابراهیمي ملت) چې په فلسطین کې د اسرائیلو (د ملګرو ملتونو پلار) لخوا دا 292 ورځې په اورونو کې سوځول کېږي، ښځې او ماشومان له یو مخې وژل کېږي، ودانۍ نړول کېږي، خلک د ژوند کولو له حق څخه محروم دي، د دې ټولو جنایتونو سره، سره دغه ناورین او ظلم جریان لري، مګر د امریکا له خوا سپورټ کېږي، شپږ نیم میلیارده ډالر مرسته ورکول کېږي، بېلابېل مزایل او بمونه د امریکا لخوا له اسرایلو سره مرسته وشوه، څو د غزې په مظلومانو وکارول شي؛ د امریکا لخوا دا امتیازات یوازې خپل بشر ته ورکول کېږي او بل بشر چې تر مرګ او وژنو لاندې حصار دی، د ملګرو ملتونو په دایره کې د راټولو هېوادونو لخوا تر بندېزونو لاندې نیول کېږي، ټول هغه حقوق چې دوی یې دعوه کوي.
لکه: د انسان د ژوند له حق څخه دفاع، د خوراک او څښاک حق، غوره صحي خدمات، د استوګنې مناسب ځای، زده کړې او ورته نور داسې موارد، چې دوی یې دروغجنه دعوه کوي، له پورتنيو ټولو مواردو څخه د غزې مظلوم او بې دفاع بشر د ملل متحد او د هغه د متحدینو لخوا محروم کړل شو؛ حتی اوس هلته خلکو ته د ژوند کولو حق نه ورکول کېږي.
او ملکري ملتونه دغه بشري ناورین ته د ناورین په سترګه نه ګوري، ځکه دغه ظلمونه د دوی په ملت نه، بلکې په ابراهیمي ملت ترسره کېږي.
د بشر حقوقو مدافع هغه چاته ویل کېږي: چې په انفرادي شکل او یا له نورو سره په ګډه د بشر حقوقو د ښه والي او ملاتړ لپاره فعالیت ترسره کوي.
د دوی (ملل متحد سازمان د بشر حقوقو عالي کمېشنرۍ) په وینا چې د بشر حقوقو مدافعین د بشر حقوقو مختلفې اندېښنې؛ لکه: پرته له محکمې اعدام، ځورونه، خپل سرې توقیف خانې، جبري اخراج او داسې نور تر پوښښ لاندې نیسي او په اړه يې اقدام کوي.
همدارنګه د دوی په نظر د بشر حقوقو مدافعین د انسان د پراخو حقوقو؛ لکه: د ژوند حق، خوراک او څښاک، غوره صحي خدمات، د استوګنې مناسب ځای، زده کړې او د تګ راتګ له آزادي څخه ملاتړ او د بهبود لپاره يې کار کوي، خو دا ټول دروغ دي.
په نړۍ کې تېرو څو لسیزو یا که ووایو له کله چې د دوی دا دروغجنه داعیه پيل شوې، له هغه وخت نه تر اوسه پورې ډېری داسې پېښې شوې، چې د بشر حقوقو د دفاع رایجه داعیه دروغ او فریب تثبیتوي.
آیډیالوژي یا فکر په نړۍوال سیاست کې هغه وخت کامیابېږي، چې قوي معنوي مشروعیت او د انساني ټولنې مادي مشکلاتو لپاره حل ولري.
له نړۍوالو جنګونو څخه ورورسته چې د بشري ناورین د حل لپاره دغه بل بشري ناورین (ملګري ملتونه) اېجاد شو، دا بل نړۍوال جنګ بللی شو، چې قربانیان یې یوازې د ابراهیمي ملت وګړي دي.
امریکا په تېرو څو لسیزو کې ډېر فکري مکتبونه او نړۍوالې ټولنې جوړې کړې، اوس هم د حقوق بشر په نوم ډول، ډول توطېې جوړوي.
نور دغه دروغجنه داعیه له نړۍوال ستېج څخه د راپرځېدو په حال کې ده، د اسلامي امت د اتحاد زرینه موقع ده، غرب هرڅه وبایلل، د غرب حیثیت نور له خاورو سره خاورې شو، نور نو د دې وخت رارسېدلی دی، چې دغه میدان ته نوی لوبغاړی را ودانګي او خلک د انسانیت په مفهوم وپوهوي.
یوه ورځ به د بشر حقوق د خیر البشر په دین او منهج یو ځل بیا اعاده کېږي؛ بیا به نړۍ د بشریت پر مفهوم پوهېږي، بیا به نړۍ له انسانیته مالاماله شي. إن شاء الله