د امربالمعروف و نهي عن المنکر پر وزارت د یوناما نیوکې هېڅکله د افغان مسلمان ملت لپاره د منلو وړ نه دي، ځکه په افغانستان کې په سلو کې سل سلنه وګړي ټول مسلمانان دي، او د اسلام پر احکامو خوښ دي، نوموړی وزارت هم خلکو ته د اسلام قوانین توصیه کوي.
د یوناما په خپره شوې اعلامیه کې راغلي چې: د طالبانو حکومت د نهی عن المنکر وزارت د موسیقۍ غږول یا اورېدل، د قیلون څکول، د انسان او څارویو د انځورونو ننداره کول او د جادو په ګډون د نوروز، یلدا شپې او عاشقانو د ورځې لمانځل نااسلامي ګڼي او مخه یې نیسي.
د یوناما څخه په دغه خپره شوې اعلامیه کې ویل شوي، د امر بالمعروف وزارت د ۲۰۲۳ کال د ډیسمبر په ۲۴مه پر خپله ایکس پاڼه ولیکل، د یلدا د شپې لمانځل د اسلام نظره حرام او ګناه ده.
د یوناما په دغه اعلامیه کې راغلي چې: همدارنګه د ۲۰۲۳ کال په فبرورۍ کې د دغه وزارت مامورینو ته وویل شول چې خلکو ته د عاشقانو د ورځې د لمانځلو حراموالي په اړه عامه پوهاوی ور کړي.
دوی ته دې وویل شي چې هو! کوم شیان چې تاسو دلته یاد کړي دا ټول په اسلام کې ناروا اعمال او کړنې دي؛ موږ مکلف یو چې د اسلام پر احکامو عمل وکړو، ځکه چې افغان ملت مسلمان ملت دی، او مسلمان ملت هېڅکله د اسلام پر احکامو ستاسو بې ځایه نیوکو ته غوږ نه نیسي او نه له تاسو دا غوښتنه کوي چې ګناه ته یې راوبلئ، اسلام د افغان مسلمان ملت لپاره سره کرښه ده، هېڅکله نه ترې تېريږي.
همداراز یوناما په خپله اعلامیه کې ویلي چې: د امربالمعروف وزارت موسیقي حرامه او په ټولنه کې یې د منکراتو د ترویج لامل ګڼي او وایي: د اسلام ريښې له منځه وړي.
هو! اسلام وایي چې موسیقي اورېدل د انسان په زړه کې نفاق پیدا کوي، لکه ابن مسعود رضی الله عنه وايي: «العناء ينبت النفاق في قلب کماينبت الماء الزرع» (ابوداود بيهقي).ژباړه: موسيقي په زړه کې نفاق داسې تازه کوي لکه اوبه چې کښت تازه کوي.
څه فکر کوئ؟ ایا افغان مسلمان ملت به ستاسو خبرو ته غوږ شي او که د امربالمعروف و نهي عن المنکر وزارت خبرو ته؟ سره له دې چې تاسو یې نفاق ته رابلئ او یاد وزارت یې مسلمانۍ ته رابلي.
یوناما ته دې وویل شي: کوم څه چې د امربالمعروف و نهي عن المنکر وزارت مامورین توصیه کوي هغه د اسلام او مسلمانانو غوښتنه ده، ستاسو نیوکې بې ځایه دي او د افغان مسلمان ملت په حق کې د قبول وړ نه دي.
دلته غوڅ اکثریت بلکې ټول مسلمان وګړي میشت دي، دوی دې افغان مسلمان ملت له غربي لیدلوري نه ارزوي، دوی دې د کفري هېوادونو طریقې او تګلارې دلته نه غواړي، دلته د اسلام او د اسلامي احکامو د نفاظ لپاره بې شمېره قربانۍ ورکړل شوي، د شریعت تنفیذ د افغانانو غوښتنه او سره کرښه ده چې هېڅکله به ترې تېر نه شي.
په افغانستان د اسلامي امارت په حاکمیت سره د اتباعو ټول شرعي حقوق تامین دي، که ښځينه دې که نارینه شرعی برخورد ورسره کېږي او د اسلامي شریعت احکام د قوانینو په څېر د اجراء وړ دي، په دې اړه له چا سره هېڅ ډول زور زیاتی او ظلم نه کېږي.
موږ افغان مسلمان وګړي د اسلامي امارت په بیاځلې راتګ سره خپلو ارمانونو ته ورسېدلو، موږ ته خپل حقوق راکړل شول، موږ د ژوند په خوند پوه شوو، موږ اوس ایله په دې پوه شوو چې په ازاده فضاء کې ژوند کول رښتیاهم یو لوی نعمت دی، الله دې دا نعمت (اسلامي امارت او په ازاده فضاء کې ژوند کول) له موږ څخه هېڅکله نه اخلي.