د شمالې ټلوالې پاتېشوني او د مقاومت په نوم یوه پردۍ او روزل شوې ډله، چې تل يې په هېواد کې د اختلافاتو، ناامنۍ او هېواد پلورنې لپاره د پردیو د ګټو لپاره کار کړی دی چې نه افغان مني او نه هم افغانستان؛ د قدرت ترلاسه کولو لپاره هرې استخباراتي ډلې ته لاس ورکوي.
دا هغه کسان دي چې ځانونه یې د خپل دین او هېواد خلاف په ناسمه لاره کې اچولي، اوس په هرې خوا منډې وهي، ترڅو داسې بادار پیدا کړي، چې د غلامۍ ځنځیرونه ور په غاړه کړي؛ دا ځل يې آی ایس آی ته خپله غاړه خم کړې ده.
د دې ډلې اړوند د عظیم الله فاروقي په نوم د یو جاسوس نیول کېدل او د شر او فساد اړیکې له آی ایس آی سره افشا کول، یوه حساسه پېښه ده؛ په ټولیز ډول، دا پېښه د افغانستان او پاکستان د اړیکو د حساسیت څرګندونه کوي او ښيي چې پاکستان په سیمه کې د ناامنۍ لپاره د یو ډول پټ رقابت په حال کې دی.
ياده ډله مجبوره ده چې د خپل بنسټګر(احمدشاه مسعود) په نقش قدم باندې پلونه کېږدي؛ د شر او فساد شریره ډله افغانان نوره ښه پېژني، له نامه څخه یې د هر افغان مسلمان خوا راګرځي؛ خو سوال دا دی چې پاکستان ولې د دا ډول خلکو روزنې او نمو ته کار ویلی دی؟زه به یو څو هغه لاملونه ذکر کړم چې پاکستان دې او دېته ورته کړنو کې ولې وخت نا وخت ملوث ګرځي؟د پاکستان او افغانستان تر منځ اړیکې د تاریخي، جغرافیایي او سیاسي عواملو له کبله ډېرې پېچلې دي؛ پاکستان د افغانستان په چارو کې د یو شمېر لاملونو له مخې لاس وهنه کوي:
١. امنیتي اندیښنې:
پاکستان اندېښنه لري چې که افغانستان باثباته او ځواکمن شي، نو دا به د پاکستان پر امنیت باندې اغېزه وکړي؛ پاکستان د افغانستان په دننه کې د خپلو دوستانو خو په داخل کې د نظام د مخالفینو او د هغو ډلو ملاتړ کوي، چې د دوی د اهدافو د تحقق په لاره کار کوي.
٢. امنیتي اندیښنې او نیابتي ځواکونه:
پاکستان د ځینو ډلو ملاتړ د دې لپاره کوي، چې د دوی د امنیتي ادارو لپاره په افغانستان کې یو ډول نفوذ ولري؛ ځینې ډلې د پاکستان په ګټه کار کوي او د دې لپاره د پاکستان له خوا ملاتړ کېږي، ترڅو د تحریک طالبان پاکستان (TTP) په څېر ډلو پر ضد د افغانستان له خاورې څخه کار واخیستل شي.
٣. د قومي تړاو مسئله:
پاکستاني پښتانه او افغان پښتانه ژبني او کلتوري اړیکې لري، او ځینې پاکستاني پښتانه د “پښتونستان” د نظریې ملاتړ کوي، چې له پاکستان سره د افغان پښتنو اتحاد غواړي؛ پاکستان د دې څخه د ځان لپاره خطر احساسوي او له همدې کبله هڅه کوي چې په افغانستان کې کړکېچ ته لاره هواره کړي.
٤. اقتصادي ګټې:
له افغانستان سره د پاکستان اقتصادي اړیکې هم یو مهم لامل دی، او په ځلونو، ځلونو پاکستان د افغاني صادراتو پر وړاندې له غیر اسلامي چلند څخه کار اخیستی دی؛ پاکستان د افغانستان د سوداګریزو لارو د کنټرول هڅه کوي، او غواړي چې افغانستان د دوی پر سوداګریزو لارو تکیه ولري او افغانستان یو اړ هېواد وي.
٥. د نفوذ ساتل:
پاکستان غواړي چې افغانستان په سیمه کې د دوی د سیاسي او اقتصادي نفوذ یوه برخه پاتې شي، او له همدې کبله هڅه کوي چې هلته خپل اغېز ولري او د هغو ډلو ملاتړ وکړي، چې د دوی د اهدافو په لور کار کوي، چې دا نفوذ د شر او فساد د بنسټګر په وخت کې خورا زیات ژور وو.
په ټوله کې، پاکستان هڅه کوي چې په افغانستان کې یو باثباته خو په خپل کنټرول کې نظام ولري، چې د دوی امنیتي او اقتصادي ګټې خوندي کړي؛ خو دا ځل له یو داسې مسلمان نظام سره مخ شوی دی چې هيڅکله به یې شوم پلانونه عملي کېدلو ته پرېنږدي او ناولي ارمانونه به یې له خاورو سره خاورې کړي.
ان شاءالله
یادؤنه: په هندوکشغږ کې نشر شوې لیکنې، مقالې او تبصرې یواځې د لیکوالانو نظر څرګندوي، د هندوکشغږ توافق ورسره شرط نه دی.