هره ډله، ګوند، حزب، خوځښت او جريان چې کله مبارزه ترسره کوي، له پيل وړاندې او د مبارزې په درشل کې خپل اصول، موخه او تګلاره روښانه کوي چې په راتلونکي کې بيا دوی د همدې په اساس استدلال او د خپل خوځښت او جريان لپاره خلک جذبوي.
په کابل د اوسني حکومت درې کلنې واکمنۍ له پوره کېدو ور هاخوا يې، يو مخالف جريان چې ځانته د هيواد راتلونکی او د ملي مخ تاړی کاروي، د مقاومت په نامه سره، په تېرو دريو کلنو کې یې د خپلې مبارزې، تبلیغاتو او موخو هيڅ ډول وضاحت او مخ معلوم نه شو.
د مقاومت/بغاوت په نوم دا ډله، چې په هيواد کې د امريکا او غربي نړۍ له ماتې وروسته د واګو ترلاسه کولو خيالي خوبونه ویني، په اوس کې د هيڅ يوې واحدې تګلارې او د بریالیتوب په صورت کې د هيڅ نموني حکومتولۍ پلان او طرحه له ځان سره نه لري.
په درې کاله کې دغه د هيواد څخه بهر کې مېشتو، په يوازې توګه دا هم و نه شو کولای چې يو ګډ ميکانيزم او چارچوب رامنځته کړي، چې څه ډؤل مبارزه، په هيواد د واکمن نظام سره په کومو شرايطو خبرې او د بریالیتوب په صورت کې افغانستان تر کوم قانون، نظام او ډول د حکومتي چوکاټ څخه رهبري کوي.
دا هغه څه دي چې دوی خپله په خپل منځ کې په دې برخه کې د ناکامیو اقرار کوي.
د همدې مقاومت/بغاوت په نوم د شر او فساد د رهبري شوری يو غړي، څو ورځې وړاندې يوې رسنۍ سره د خبرو پر مهال له دې ناکامي پرده پورته کړه.
د پرځېدلي جمهوریت پرمهال د ملي امنیت مشر رحمت الله نبیل وويل، مونږ په تېرو دريو کلنو کې په دوه برخو کې په کامله توګه ناکام يو؛ هغه ويل: درې ورک شیان لرو، يو دا چې تر دې دمه او دريو کلنو کې مونږ په دې برخه کې په وضاحت کې ناکام يو چې «مونږ څه غواړو؟» دا ډېره مهمه ده چې مونږ واضحه کړو چې مونږ څه غواړو، زموږ د ډلې خپل منځ کې کشمکش دا ده چې ځينې له اسلامي إمارت سره خبرې کوي، ځينې جګړه کوي او ځینې لا واضح دريځ نه لري، نو دا زموږ ناکامي ده چې مونږ څه غواړو.
نبيل زياتوي، دوهمه خبره دا ده چې «مونږ څه ډول افغانستان غواړو؟» د مقاومت د شوری ځینې غړي وايي چې بيا دې امريکايان راشي او مونږ دې واک ته ورسوي، ځينې وايي چې (طالب) اسلامي إمارت ښه ده او ځينې د افغانستان تجزيه او وېش غواړي.
دا يوازې نبيل نه دی، بلکې د همدې شر او فساد نور غړي په مجازي او انلاين ناستو کې هم لا سره جوړ او يو دريځ نه لري.
په داسې حال کې چې دوی د ادعا په اساس د هيواد راتلونکي رهبران ځانونه بولي؛ بيا دا پوښتنه کېږي، دوی چې په تېرو دريو کلنو کې په مجازي او انلاين ناستو کې توافق او يو دريځ نه لري او نه هم داسې تګلاره او اصل لري، چې د هغه په اساس اوس دوی خپله مبارزه رهبري او احيانًا واک ته له رسېدلو سره څه ډول افغانستان او څه ډول حکومتولۍ پرې غواړي.
په نچوړ او کلي توګه اخذ کېږي او داسې پایله ترلاسه کېږي، چې د نورو د موخو او افغان وژنې لپاره جنګېدونکي خلک همداسې بې موخې او سر درګمه وي او هيڅ ډول توافق او خپلمنځي يووالي ته به ونه رسېږي.
یادؤنه: په هندوکشغږ کې نشر شوې لیکنې، مقالې او تبصرې یواځې د لیکوالانو نظر څرګندوي، د هندوکشغږ توافق ورسره شرط نه دی.