د شر او فساد ډلې په هيڅ صورت د هیواد پرمختګ نه شي زغملی، په تېره شل کلنه دوره کې د مافیاو څرګند حضور او فعالیتونه د هېواد د سیاسي، اقتصادي او ټولنیز وضعیت د خرابېدو لامل ګرځېدلي وو.
هغه وخت د دې مافیاو ترشا، نه یوازې داخلي کسان وو، بلکې ځینې بهرنۍ کړیو هم په ښکاره او پټه فعالیت درلود چې، افغانستان د خپلواکۍ او پرمختګ پر لور حرکت ونه کړي.
د شر او فساد همدې مافیاوو چې، په نړېدلي جمهوري نظام کې یې فعالیت درلود، په ډېرو برخو کې د حکومتي او ټولنیزو منابعو نه غیرې عادلانه ګټه اخیسته، د فساد لپاره یې مناسب چاپېریال جوړوه، د ملت د پرمختګ لارې یې مسدودولې.
د قومي مافیاوو حضور چې، د یو ځانګړي قوم او یا ډلې له لورې تنظیم شوي وو، د هېواد د یووالي او سولې لپاره یو ستر ګواښ و.
د پرګنو ترمنځ وېش، بې عدالتي او د زور سیاست د دې مافیاوو مهمې برخې وې چې، د خلکو ترمنځ یې بدبیني او د شخړو فضا رامنځته کړې وه.
د شر او فساد ډلې غواړي چې، خپلې ګټې خوندي وساتي، قومي او ژبني تعصباتو ته زمینه سازي وکړي، ترڅو یې ګټې خوندي وساتل شي، افغانستان خودکفا نه شي.
دا چې افغانان له حده زیات، زورېدلي او کړېدلي دي؛ زه د یو افغان او مسلمان په حيث له هر څه دا ډېره اړینه بولم چې، په هیواد کې د شر او فساد مافیاوي شبکې افشا شي، جرړې یې له بېخه وایستل شي.
د شر او فساد/د مقاومتیانو او د ځینو نورو خیالي جبهو د غړو او هوادارانو پر وړاندې یې قانوني او عدلي تعقیب ترسره شي ترڅو د یوې شفافې، متوازنې او عادلانه ټولنې لپاره هڅې روانې شي.
که چېرته موږ وغواړو افغانستان د سولې، امن، وحدت، پرمختګ او د ورورګلوۍ لور ته لا راوګرځي، باید د هر ډول مافیاوو پر وړاندې مبارزه وکړو او د ټولنې په هره برخه کې عدالت تأمین کړو.
هغه ډلې او ټپلې چې حاکم شرعي او اسلامي نظام ننګوي او یایې پر وړاندې ضد او نقیص تبلیغات کوي؛ زما په اند د دوی مخه ډپ کول کولای شي چې، د افغان ولسونو راتلونکی پرې روښانه شي.
یادؤنه: په هندوکشغږ کې نشر شوې لیکنې، مقالې او تبصرې یواځې د لیکوالانو نظر څرګندوي، د هندوکشغږ توافق ورسره شرط نه دی.