شریرو عناصرو، منفورو او بغاوتګرو کړیو د خپل کاذب او مجازي حضور د فعاله ښودلو په موخه په دې وروستیو کې د بهرنیو استخباراتي کړیو په اشاره او مشوره په عامه ځایونو، پارکونو، د سړک د غاړې ګلدانونو، د روغتونونو مخ ته او همدا راز د ښارونو له ګڼې ګوڼې په استفادې د ملکي کسانو په منځ کې د چاودېدونو توکو د ځای پر ځای کولو او چاودلو نوی تکتیک پیل کړی، تر څو په عام ولس کې وېره خپره کړي، د دوی د عادي ژوند او نفقې پیدا کولو پر وړاندې خنډ جوړ کړي او په دغه شومو کارونو سره خپل کاذب او مجازي حضور وښيي.
دغه شریر عناصر چې په بهر کې مېشت کې دي، په تېرو نږدې دریو کلونو کې یې د ځینو هېوادونو د استخباراتي او جرمي شبکو او همدا راز د وسلو پلورونکو کمپنیو په ملاتړ په ټولنیزو رسنیو کې، په افغانستان کې د جګړې د اور بیا پیل ته په پراخه کچه کمپاین وکړ، خو دوی له یوې خوا نه یوازې دا چې په دې چاره کې سخت ناکام وو، بلکې له شدید داخلي انشعاب سره مخ شول او پر دوی ترسره شوې بهرنۍ ټوله پانګونه یې په اوبو لاهو کړه.
د دغه شریرو عناصرو د یو ځای کېدو لپاره بهرنیو استخباراتي شبکو په پراخه کچه کار وکړ، تر څو تر یوه چتر لاندې یې راټول کړي، خو د دوی په منځ کې اختلافات، شخصي غوښتنې، د واک نشې، د پیسو او شخصي ګټو علاقې، مالي او اخلاقي فسادونه او بې باوري هغې کچې ته رسېدلې چې خپل پخواني ملګري یې هم د څو ورځو لپاره نه شي راټولېدلای؛ د دوی دا کوږ بار پر نیمه لار وشړېږي.
اوس اوس دوی د خپل داخلي انشعاب، تېرو دریو کلونو پرله پسې ماتو، اختلافاتو او بې باوریو څخه د خلکو او نړۍ د پام اړولو په موخه په افغانستان کې د ځینو فعالو کړیو په مټ د عامو خلکو په منځ کې د چاودېدونکو توکو اېښودلو او چاودلو ته مخه کړې ده. که څه هم د راپورونو له مخې د دغه ډول شریرو هڅو مخه تر ډېره نیول شوې ده، خو په دې وروستیو کې څو پېښې وشوې چې د ملکي کسانو په ګڼه ګوڼه کې وې. تازه مورد یې همدا اونۍ په کابل کې د شیخ زاید روغتون دروازې ته څېرمه په ګلدان کې چاودنه وه، چې یوازې څلور ملکیان پکې برسېرن ټپیان شول.
دا شومې او له شرارت هڅې ډکې څو پیغامونه لري؛ لومړی پیغام یې په بهر کې د ناستو شریرو، منفورو او مفسدو کړیو نهايي کمزوري ده، چې دوی تېر کلونه په دې ونه توانېدل چې حتی یو کلی او یوه پوسته ونیسي، هر ځای یې چې د سر راپورته کولو هڅه کړې ده، سر یې وهل شوی، نو ځکه دوی اوس خپل تکتیک بدل کړی او ملکي اهداف په نښه کوي. دوهم پیغام یې دا دی، چې په دا ډول کمزورو، بشریت، انسانیت او اسلامیت ضد کړنو سره غواړي په خلکو کې وېره خپره کړي، تر څو دوی ووېروي چې ورسره ودرېږي او بیا عام خلک د خپلو ګټو او لوبو قرباني کړي. درېیم پیغام دا دی چې دا کړۍ په دغه ډول ناوړه او شومو فعالیتونو سره غواړي خپل داخلي انشعاب، بې باورۍ، ناکامۍ او اختلافات پټ او خپل حضور فعال وښيي. څلورم پیغام دا دی چې دوی سره له اوسه عامو خلکو ته دا تر غوږونو رسوي چې نه یې ژوند ورته مهم دی، نه ملکي اهداف او نه هم د جګړې هېڅ ډول اصولو ته ژمن دي، دوی تنها خپلو ګټو او د بادارانو فرمایشونو ته ژمن دي.
خو دا ناوړه، کمزوري، ناکام، بدنام او شوم کارونه نه د دوی ناکامۍ پټولی شي، نه عام ولس وېرولی شي، نه له چا پرې کرېډېټ اخیستلی شي او نه هم دوی خپلو موخو ته رسولای شي. د دوی دا وروستۍ ناکراره، له اضطرابه ډکې او لالهانده هڅې به دوی لا ډېر رسوا کړي، په خلکو کې به یې لا ډېر منفور کړي، د دوی او د دوی د بادارانو شومې موخې او پلانونه به لا واضح کړي او بالاخره به یې د تېر په څېر دا شوم پلانونه او موخې د تل لپاره په اوبو لاهو شي.
یادؤنه: په هندوکشغږ کې نشر شوې لیکنې، مقالې او تبصرې یواځې د لیکوالانو نظر څرګندوي، د هندوکشغږ توافق ورسره شرط نه دی.