د شر او فساد ډلې د رهبرۍ مخکښ غړي حفیظ منصور په خپله وروستۍ مرکه کې له هغه حقیقت څخه پرده پورته کړه، چې کلونه کلونه د دې ډلې لخوا هڅه کېده تر څو د افغان ملت له سترګو پټ پاتې شي. منصور په ډاګه وویل چې د پاکستان د استخباراتو یا آی ایس آی مشر تاجکستان هېواد ته په خپل وروستي سفر کې، د پاکستان په ګټه د شر او فساد ډلې د فعالیت په اړه خبرې کړې دي. ظاهراً به د شر او فساد ډله د افغانستان د تخریب لپاره له پاکستان سره یو ځای مټې رابډ وهي.
د شر او فساد ډلې د غړو وروستیو څرګندونو هغه حقیقت څرګند کړ چې ډېرو افغانانو به کلونه پخوا ویل “احمدشاه مسعود او د هغه ننني پلویان د پاکستان مزدوران دي”، خو اوس دا خبره په ښکاره او علني ډول ثابته شوه.
هغه ډله چې په تېرو وختونو کې یې په ډېر چل او دوکه د پاکستان په وړاندې د مخالفت نغاره وهله، د دوی ځینې غړي لکه امرالله صالح لا هم دا خندوونکې ادعا کوي؛ خو اوس یې ټولې پټې دسیسې د رښتینو افغانانو لپاره تر پخوا ډیرې روښانه او افشاء شوې.
ځینې سیاسي شنونکي د شر او فساد ډلې دا تګلاره د هغوی د لوري او جهت بدلون بولي، خو زموږ په نظر دا د جهت بدلون نه دی، بلکې هغه پټ حقیقت دی چې د شر او فساد ډلې له جوړېدو راهیسې، تر احمد شاه مسعود او احمد مسعود پورې، دا ډله د پاکستان په لاسونو کې د یوې آلې په توګه کارېدلې او نن یې دغه پټ حقیقت هم بربنډ شو.
یوه بل ډېر مهم ټکی چې حفیظ منصور په خپله مرکه کې یاد کړی، هغه دا چې طالبان له پاکستان سره دښمني لري. منصور ویلي چې په دې وروستیو کې د پاکستان د بریدونو په وړاندې د افغانستان له خاورې څخه د طالبانو ننګه او دفاع دا څرګندوي چې طالبان د پاکستان دښمنان دي.
دا هغه خبره ده چې د شر او فساد ډلې کلونه – کلونه په سرچپه توګه ملت ته بیانوله، خو اوس یې له پاکستان سره د طالبانو دښمني په خپله په ډاګه کړه. د شر او فساد ډلې له لوري دا اعتراف او منل چې طالبان د پاکستان دښمنان دي، د دې اسلامي غورځنګ لپاره به د تاریخ په پاڼو کې د دښمن له خولې د راوتللي یوه زرین او طلایي ټکي په توګه پاتې شي.
پاکستان چې خپله سوکالي یې همېشه د افغانستان په ورانۍ او بېثباتۍ کې لټولې ده، د هېواد د آبادۍ لپاره د طالبانو بې درېغه هڅو پاکستان او آی ایس آی وارخطا کړي، د هېواد د اوسني امنیت او آبادۍ د چټک بهیر د مخنیوي لپاره د لارو او وسیلو په لټه کې دي. په دې کې د احمد شاه مسعود زوی احمد مسعود او د بغاوت ډلې نورو مشرانو چې همېشه یې ملې ګټې د شخصي ګټو لپاره قربان کړې دي، د پاکستان غوښتنو ته مثبت ځواب ویلی دی.
د شر او فساد ډلې د دې غلامۍ د افشاء کېدو پایله د افغانانو لپاره مثبته ده. ځکه هغه افغانان چې تر اوسه یې احمد شاه مسعود ته د قهرمان فکر کاوه، اوس په دې وپوهېدل چې نوموړی له یوه غلام پرته بل څه نه و. د اسلامي او ملي احساس په پارېدلو سره به هیڅ افغان نور د پاکستان مزدورانو ته د سر پورته کولو وخت ورنه کړي.
افغان ملت د دې ډول دسیسو او توطئو په وړاندې په خپل ټول توان سره مبارزه کړې ده، هیڅکله به اجازه ورنکړي چې د افغانستان امنیت د پاکستان د آی ایس آی له لوري د امرالله صالح او احمد مسعود په لاسونو خراب او زیانمن شي.
یادؤنه: په هندوکشغږ کې نشر شوې لیکنې، مقالې او تبصرې یواځې د لیکوالانو نظر څرګندوي، د هندوکشغږ توافق ورسره شرط نه دی.