د انادولو خبري اژانس د راپور له مخې کيوبا په رسمي ډول د جنوبي افريقا له لوري د جرمونو نړيوالې محکمې ته د اسرائیلو پر ضد د نسل وژنې په ثبت شوې قضيه کې د رسمي ګډون غوښتنلیک سپارلی دی.
د جرمونو نړيوالې محکمې ويلي دي« کيوبا د محکمې د اساسنامې د ۶۳ مې مادې له مخې په غزه کې د اسرائیلو له لوري د نسل وژنې د مخنيوي او سزا په اړه د جنوبي افريقا په ثبت شوې قضیه کې د ګډون غوښتنه کړې ده».
د يادونې وړ ده چې د ۲۰۲۳ کال په ډسمبر کې جنوبي افريقا د جرمونو په نړيواله محکمه کې په غزه کې د صهيونيستي اسرائیلو له لوري د نسل وژنې او جنګي جنايتونو پر ضد قضيه ثبت کړه چې له هغې راوروسته د نيکاراګوئه، کولمبيا، ليبيا، مکزيک، هسپانيې او ترکیې په ګډون ځينو نورو هېوادونو هم له يادې قضيې سره يوځای شوي دي.
صهيونيستي اسرائيلو د ټولو نړيوالو اصولو پر خلاف د ۲۰۲۳ کال په اکټوبر کې پر غزه بريد وکړ چې تر اوسه یې شاخوا ۴۶ زره عام فلسطيني وګړي چې لويه برخه یې ښځې او ماشومان دي شهيدان، له يولک ډېر ټپيان او ميليونونه نور خپلو ځايونو پرېښودلو ته اړ کړي.