د دغه موضوع له بیا مطرح کېدو سره، د مقاومت جبهې د علماوو شوری رئیس حبیب الله حسام د افشار موضوع ته په اشارې، په یو ټویټ کې د احمد شاه مسعود د سپیناوي په موخه ویلي، هوښیاري اړینه ده، ترڅو د مکارو دښمنانو ښکار نهشو. زیاتوي، هغه کسان چې هويتي، تمدني او فرهنګي اصالت نه لري او د خلکو لپاره د لویې ادعا خاوندان نه دي، د نفاق د دېوال تر شا څرېږي او ګرځي.
د نوموړي یادې څرګندونې د احمد شاه مسعود او د ټولو هغه مجرمینو پر ستر جنایت سترګې پټول دي، چې په افشار کې یې په خورا قساوت سره ترسره کړ؛ د متحدي جبهې/ټلوالې جنګیالیو د خپلو وسلوالو مخالفینو تر څنګ عام ځوانان، سپین ږیري، ماشومان او ښځې هدف وګرځول او د نه بښونکي جنایت مرتکب شول.
د افشار پېښې په ارزولو به دې پایلې ته ورسېږئ، چې د هزاره قوم د نسل وژنې تر ټولو خونړۍ پېښه همدا ده، خو تر اوسه لا هم د دغه پېښې عاملین محکمې ته نه دي ور کش شوي. د احمد شاه مسعود پلویان د دې جنایت له پېښېدو لسیزې وروسته لا هم پر دغه جنایت سترګې پټوي او اوس هڅه کوي د ولسي محکمې له ډاره ځان سپین وښیي.
