د افغانستان په دې وروستیو پنځو لسیزو کې تنها تېر درې کاله داسې وخت دی، چې ولس په ډاډ، له کومې ويرې پرته د ژوند له هرې لحظې او شيبې خوند اخلي، د هېواد لر او بر ته له کومې ستونزې، ننګونې او تعصبي چلند پرته سفر کوي، د هېواد له طبعي ښکلا او لا مثاله امن خوند اخلي، همدا راز دا بې نظيره امن د هېوادوالو لپاره د حلالې روزۍ د ګټلو لارې چارې هم اسانه کړې دي.
مګر بهر مېشتي پخواني سیاسیون او په بېلابیلو نومونو جوړې شوې ډلې بیا د امن او سوکالۍ دغه وضعیت نشي زغملای، دوی بیا د وینو بهولو لپاره په کمپاینونو، خبرو او هڅونو بوخت دي او غواړي د دغه امن د له منځه وړلو او شخصي ګټو د تأمین په موخه د ولس د قتلولو پروژې واخلي.
دوی چې افغان بچي يې د واشنګټن، لندن او نورو پردیو د امینت د ساتنې لپاره قرباني کول، د هماغه شېبو او حالاتو د بيا اعادې لپاره يې راشه – درشه پيل کړې او همدا څېرې د غرب د ساتنې په موخه د ټول ولس د قرباني کولو لپاره هم تیار دي.
دا بې هویته سیاسیون د ولس له خوا عاق شوي، همدوی دي چې په دوشنبې، استانبول، ویانا او نورو ځایونو کې د افغانانو له ازلي دښمنانو سره د افغانستان پر سر د معاملې لپاره ناستې کوي، پر افغانانو یې شته سوکالي او ارام ژوند نه لورېږي او غواړي د تېر په څېر بیا ولس د خپلو سلیقوي غوښتنو قرباني کړي.
دوی د قتلونو د نوې څپې پرانیستلو، مفسد نظام د بيا اعادې، د قدرت جزيرو بيا رامنځ ته کولو او پردیو موخو د تحقق لپاره د افغان خاورې پلورلو ته هم تیار دي او ډیورند فرضي کرښه په رسمیت پیژني.
د ولس دغه قاتلین د آی ایس آی، سي آی اې او موساد په شمول د هرې جنایت کارې استخباراتي ادارې دروازه ورټکوي او پر افغانستان د حاکمیت د ترلاسه کولو په موخه له هر یوه مرسته غواړي، تر څو د جګړې او ولس وژنې بل فصل هم پرانیزي.
دوی تنها په خوله او شعاريزه توګه ځانونه د افغانستان او افغان ولس خواخوږي معرفي کوي، خو په واقعیت کې بیا د واک ترلاسه کولو او شومو موخو د تحقق لپاره د دوی یوازینی انتخاب د افغان وژنې او افغان خاورې پلورنې پروژه ده.
یادؤنه: په هندوکشغږ کې نشر شوې لیکنې، مقالې او تبصرې یواځې د لیکوالانو نظر څرګندوي، د هندوکشغږ توافق ورسره شرط نه دی.