د ايران د ايرنا خبري آژانس د راپور له مخې، د ايران د ترافيک پوليسو يوه لوړپوړي چارواکي سردار حسن مومني رسنيو ته ويلي چې، په دغه هېواد کې د تېرو دولسو ورځو په ترڅ کې د ترافيکي پېښو له امله ۴۱۹ تنه مړه او ۹۷۷۸ تنه نور بيا ټپيان شوي دي.
سرچينې زياته کړې چې، د ايران ترفيک پوليس وايي چې په تېرو دولسو ورځو کې په دغه هېواد کې شاخوا ۵۷ زره ترافيکي پېښې ثبت شوي، چې ۸۰ سلنه یې د موټر چلوونکو د بې احتياطۍ له امله رامنځته شوې دي.
د معلوماتو له مخې، د يادو پېښو ډېره برخه یې په کرمان، خراسان رضوي، فارس او خوزستان ولايتونو کې پېښې شوې دي.
د پېښو د ډېرېدو ستر لامل دغه هېواد کې د نوي کال د جشن لمانځلو په نيت تفريحي سيمو ته د بې شمېره سېلانيانو تګ ښودل شوی دی.