څو ورځې وړاندې په تاجکستان پلازمېنه دوشنبه کې د مقاومت په نوم جبهې په خپل منځي مجلس کې د يادې جبهې مشر احمد مسعود او روند سبز د مشر امرالله صالح تر منځ چې د يادې جبهې غړيتوب هم لري؛ لفظي شخړه رامنځ ته شوې.
هندوکش غږ ته د مقاومت په نوم جبهې له منځه کره او باوري سرچينو د ياد مجلس او شخړې پخلی کړی، د سرچينو په وينا د امرالله صالح غوښتنه دا وه چې روند سبز بايد د مستقل جريان په حيث د مقاومت جبهې د يو متحد په توګه خپل فعاليتونه ترسره کړي خو احمد مسعود له دې وړانديز سره سخت مخالفت کړی او ټينګار يې کړی چې مقاومت جبهه يو واحد تنظيم دی او روند سبز بايد په دې تنظيم کې راګډ او يوه برخه وي.
د سرچینو په وينا، په دې مجلس کې د دواړو تر منځ دا بحث په لفظي شخړه واوښت، امرالله صالح احمد مسعود ته په ښکاره ډول وويل: زه نور د رهبري او مشري حق لرم، زه وم چې ته (احمد مسعود) مې له کابل څخه پنجشير ته راوويستې او هلته مې د طالبانو په مقابل کې مقاومت شروع کړ.
خو احمد مسعود، امرالله صالح ته د دې خبرو په ځواب کې د سپک، احمق او بې عقل خطاب کړی دی او ټينګار يې کړی چې روند سبز به هيڅکله د مستقل جريان او تنظيم په توګه ونه مني. د سرچينې په وينا، احمد مسعود او امرالله صالح تر منځ د دې توندو الفاظو له تبادلې وروسته امرالله صالح ياد مجلس ترک کړ.
دا د امرالله صالح د هغو هڅو دوام دی چې غواړي له مقاومت جبهې څخه خپله لاره جلا او د روند سبز په نوم نوې جبهه يا تنظيم فعال کړي.
د هندوکش غږ د سرچينو د مؤثقو معلوماتو په اساس نوموړي له ډيره وخته په پټه د مقاومت په نوم جبهې ځينې ناراضه کسان هم له ځان سره ملګري کړي او څه موده وړاندې يې غوښتل چې له يادې جبهې خپله لاره جلا کړي، هغه مهال يې هندوکش غږ په اړه يو مستند راپور هم نشر کړی و، چې وروسته د امرالله صالح د روند سبز رهبري تر يو وخته د ياد پلان د تطبيق د ځنډولو پرېکړه وکړه.