هندوکش غږ د آی ایس آی له منځه د خپلو تازه او دقيقو ترلاسه شویو معلوماتو په اساس موندلې، چې د اسرائیلو د استخباراتي شبکې(موساد) يوه هيئت اسلام آباد ته سفر کړی دی.
دا په تېره نږدې يوه نيمه مياشت کې د دواړو لورو تر منځ دوهم سفر دی چې ترسره کېږي؛ څه د پاسه يوه مياشت مخکې هم پاکستاني استخباراتي هيئت اسرائيلو ته د يو مطبوعاتي ټیم او خبريالانو تر پوښښ لاندې سفر کړی و، چې د اسرائيلو يو خبري آژانس (اسرائيل هيوم) او ځینو مؤثقو عربي خبري سرچينو له دغه سفر څخه پرده پورته کړې وه.
که څه هم پاکستان ته د اسرائيلي هيئت د سفر اصلي هدف او له پاکستاني چارواکو او استخباراتي مسؤلینو سره يې د ليدنې اصلي اجنډا نه ده ترلاسه شوې، خو د منځني ختيځ وروستي وضعيت ته په کتو تحليل کېږي چې دواړه لوري د ايران په اړه ګډ اهداف لري.
څه موده وړاندې هندوکش غږ له خپلو کره او باوري سرچینو څخه معلومات ترلاسه کړي وو، چې پاکستاني استخبارات د اسرائيلو له استخباراتو سره په همغږۍ، له پاکستان سره نږدې د ايران په سرحدي سيمو کې د ځينو اهدافو د له منځه وړلو او افرادو د ترور پلان لري، چې د ايران د سپاه پاسداران ځينې مهم کسان هم پکې شامل وو.
د کره معلوماتو په اساس په دې وروستیو کې له اسرائيلو سره د روابطو د عادي کولو لپاره د پاکستاني چارواکو تمايلات ډير شوي دي، معلومات دا هم ښيي چې پاکستاني چارواکي او استخبارات يې په خصوصي ډول د اسرائيلو حمایت کوي او د روابطو د عادي کولو او حتی د رسمي اړيکو په هڅه کې دي، خو په دې برخه کې د پاکستان ځينې اسلامي او مذهبي څهرې او ګوندونه اصلي خنډ دي.
امریکا په دې وروستیو کلونو کې په عربۍ نړۍ او منځني ختیځ کې له اسرائیلو سره د اړیکو د عادي کولو لپاره پراخ کمپاین پیل کړی و، خو پر اسرائیل د حماس له برید وروسته، هغه پروسه په ټپه ودرېده. د حماس او اسرائیل له نږدې یو نیم کلنې جګړې او په غزه کې له پراخو جنایتونو، نسل وژنو او وحشتونو سره سره، اسرائیل او امریکا اوس بیا هڅه کوي چې هغه پروسه روانه وساتي. نو پاکستان د دې موقع څخه په استفادې هڅه کوي چې د دې پروسې مخکښ شي او د ځینو مادي امتیازاتو د ترلاسه کولو په بدل کې له اسرائیل سره اړیکې عادي کړي.
د دې ترڅنګ، پاکستاني پوځ، استخبارات او حکومت په دغه هېواد کې د روان کشمکش یو اصلي عامل ایران بولي او اوس هڅه کوي چې په منځني ختیځ کې د ایران او اسرائیل د ټکر یوه برخه دلته هم راوړي. پاکستان غواړي چې دلته هم دوه مخې او ان درې مخې لوبه پر مخ بوځي، اسرائیل ته د ایران ضد کړنو لپاره خپله خاوره په واک کې ورکړي او په بدل کې یې له اسرائیل او امریکا امتیاز واخلي او دغه راز پر ایران هم فشار راوړي په یو ډول یې د باج او امتیاز ورکړې ته اړ کړي. د دغه ټکرونو تر سیوري لاندې ښايي د پاکستان پوځ به هلته د بلوڅو او پښتنو پر وړاندې د ظلمونو او وحشتونو یوه نوې لړۍ پیل کړي او هڅه به وکړي چې خپل مخالفین چې په دې وروستیو کې ډېر پیاوړي شوي، وځپي.