د عدلیې وزیر، شیخ عبدالحکیم شرعي: د خپل مسئولیت په اداء کولو کې د چا پروا نه لرو، ظالم او فاسد چې د هر موقف، هر قوم، هر فکر او هر مذهب وي، د قانون منګولو ته یې سپارو
د عدلیې وزیر، شیخ عبدالحکیم شرعي د ځینو کړیو او مغرضو رسنیو منفي تبلیغات چې ګواکې د عثمان په نوم د نوموړي زوی، په «نوي کابل» پروژه کې دفتر خلاص کړی رد کړي او ویلي یې دي، چې نوموړی په دې نوم کوم زوی نهلري.
ښاغلي شرعي ویلي، چې نه غواړي د انټرنشنال په څېر تبلیغاتي ادرسونه ته پر ځواب ویلو وخت ضایع کړي؛ خو دا چې ملت ته یو وضاحت وي، دی د عثمان په نوم زوی نه لري او د زامنو له ډلې یې هېڅ یو هم تجارتي دفتر نه لري.
د عدلیې وزیر هغه ادعاوې چې ګواګې نوموړی د خپلې مېرمنې په نامه ځمکه لري هم رد کړې او ویلي یې دي، چې د ده په کورنۍ کې د ښځینهوو پر نوم نه ځمکه ثبت وه او نه ثبت ده. په خبره یې که یې ولري هم کوم شرعي یا عنعنوي خنډ نه لري.
ښاغلي شرعي د پرځول شوي جمهوریت د پارلمان د یوه غړي محمد میرزا کټوازي له خوا د غصب شویو ځمکو د استرداد قضیې ته په اشارې ویلي: «د هر قوم، د هرې ژبې، د هر فکر خلک چې وي حساب به ورسره کېږي او کومه سرمایه چې د بیت المال ده او دوی پرې خېټې اچولي، هغه به له دوی څخه اخېستل کېږي، او بیت المال ته به سپارل کېږي.»
شیخ عبدالحیکم شرعي چې د وزارت پر مهال یې په ریکارډ کچه غصب شوې دولتي ځمکې او د بیتالمال شتمنۍ ملي خزانې ته تسلیم شوې، ډاډ ورکړی چې د ځمکو له غصب څخه د مخنیوي او د غصب شویو ځمکو د استرداد پروسه به سر ته رسوي.
ښاغلي شرعي ویلي، چې ځیني اشخاص چې په کلونو یې د ملت حقوق ضایع کړي او بیت المال یې خوړلی، غواړي د داسې تورونو له لارې چې ورسره یا فکري، قومي یا ژبنی تعصب کېږي خپل جرم ته دوام ورکړي.
هغه ویلي چې، د خپل مسئولیت په اداء کولو کې د هېڅ چا پروا نه لري، ظالم او فاسد چې د هر موقف، د هر قوم او د هر فکر او مذهب سړی وي، د قانون منګولو ته به راکش کېږي.
