د روسیې د امنیت شورا منشي، سرګي شویګو، د چین د بهرنیو چارو له وزیر وانګیي سره تر خبرو او ليدنې وروسته ويلي، چې لوېدیځ غواړي د روسیې او چین ترمنځ په ستراتیژیک اتحاد کې درز رامنځته کړي؛ خو په خبره یې په دې کار کې به بریالی نه شي.
د روسیې د امنیت شورا مطبوعاتي دفتر د شویګو له قوله لیکلي «لوېدیځوال د دې خوب ویني چې زموږ د هېوادونو ترمنځ په ستراتیژیک اتحاد کې اختلاف رامنځته کړي. زه یو ځل بیا ټینګار کوم چې مسکو او بيجينګ به بېپروا پاتې نه شي.»
شويګو همدا راز زياته کړې، چې روسیه او چین به د شانګهای د همکاریو سازمان او بریکس په چوکاټ کې هم خپلې همکارۍ لا پیاوړې کړي.