د ملي دفاع وزارت ویاند عنایت الله خوارزمي ویلي، په داسې حال کې چې د افغانستان د بهرنيو چارو وزارت له خوا اسلام اباد کې د چاودنې غندنه وشوه، خو د تېر په څېر د پاکستان دفاع وزیر سمدستي او په غیر مسئولانه ډول دا پېښه افغانستان ته منسوب کړه.
د ملي دفاع وزارت ویاند ټینګار کړی، چې دغه څرګندونې او پر افغانستان تور پورې کول هېڅ ډول منطق او بنیاد نه لري او په داسې عجولانه اظهاراتو سره یاد رژیم پر خپلو امنیتي ناکامیو پرده نه شي اچولای.
نوموړي ویلي، که د پاکستان پوځي رژیم له پېښو سمدستي وروسته عامل معلومولای شي؛ نو بیا ولې یې په مخنیوي کې ناکام دی؟
ښاغلي خوارزمي زیاته کړې، چې افغان حکومت اسلامي ارزښتونو ته ژمن دی او هیڅ کله د بېګناه انسانانو وژل او زورول د سیاسي موخو لپاره جایز نه بولي او نه هم د دا ډول ناروا کړنو ترسره کوونکو ملاتړ کوي.
د ملي دفاع وزارت ویاند وړاندې سپارښتنه کړې، چې د پاکستان امنیتي مسؤلین دې د امنیت په برخه کې له خپلې ناکامۍ څخه د تېښتې او د خلکو د پام بل لور ته د اړولو پر ځای خپل مسؤولیت په مناسب ډول ترسره کړي.
نوموړي ویلي، چې یاد رژیم دې پر خپلو سیاستونو بیا کتنه وکړي او د دې پرځای چي خپل ولس او ګاونډي هېوادونه له ځانه لیري او مخالف کړي د مثبت تعامل لار دې ونیسي.