ایکانومېک ټایمز په یوه تحلیلي راپور کې ویلي، چې له امریکا سره د پاکستان پوځي رژیم اوسنۍ نږدېوالی یوه داسې خطرناکه دوه ګونې لوبه ده چې په مستقیم ډول له چین سره د اسلام اباد پر ستراتیژیکو اړیکو ناوړه اغېزه کوي.
راپور زیاتوي، چې دا تګلاره نه یوازې د بیجېنګ باور له منځه وړي، بلکې د ناکامۍ په صورت کې به د پاکستان پوځي رژیم په نړیواله کچه له سخت ډیپلوماټیک سپکاوي او ماتې سره مخ کړي.
سرچینې وړاندې ټینګار کړی، چې بیجېنګ د واشنګټن او اسلام اباد ترمنځ هر ډول نوې معامله په جدي شک سره څاري.
په راپور کې د بیجېنګ او اسلام اباد تېرو نږدې اړیکو ته په اشارې زیاته شوې، چې د پاکستان پوځي رژیم نوی دریځ به د پاکستان پر اقتصاد او امنیت، چې په کلکه پر چین تکیه لري، خورا بدې او نه جبرانېدونکې پایلې ولري.
ایکانومېک ټایمز وړاندې دا هم لیکلي، چې د پاکستان کمزوري اقتصاد او کورنیو ننګونو ته په پام پر دغه هېواد د حاکم پوځي رژیم له خوا د زبرځواکونو ترمنځ دا ډول ناانډوله لوبه د ګټې پر ځای د یوه ستر ستراتیژیک بایلاد ګواښ له ځان سره لري.
په راپور کې راغلي، چې د پاکستان پوځي رژیم اوس د یو داسې انتخاب په وړاندې ولاړ دی چې ممکن د هېواد راتلونکی له سختو نړیوالو ننګونو او ډیپلوماټیکې انزوا سره مخ کړي.