د کانونو او پټرولیم وزارت ویاند همایون افغان ویلي، چې د ټاپي پروژې د هرات فاز ساختماني چارو کئ نږدې ۵۲ سلنه پرمختګ شوی.
هغه زیاته کړې، چې دا مهال د افغانستان په خاوره کې د نللیکې جوړولو اړوند په بېلابېلو برخو کې مهم کارونه روان دي.
په دغو چارو کې، د نللیکې لپاره د مسیر چمتو کول، د نللیکو او اړینو تجهیزاتو رالېږد، د جرونو کیندنه، ویلډنګ او د نللیکو د خښولو فعالیتونه شامل دي.
د ښاغلي افغان په خبره، تر دې دمه ۸۰ کیلو متره نللیکه غځول شوې او د نللیکې لپاره شاوخوا ۱۲۶ کیلو متره مسیر یا دهلېز چمتو شوی دی.
د کانونو او پټرولیم وزارت ویاند دا هم ویلي، چې تر دې دمه ۷۲،۳ کیلومتره نوره نللیکه د پروژې ساحې ته رالېږدول شوې ده.