په افغانستان کې د ملګرو ملتونو د مرستندویه پلاوي (یوناما) سرپرستې جورجت ګانيون، د افغانستان په اړه د امنیت شورا غونډې ته ویلي چې دغه هېواد د اوسني حاکمیت تر واک لاندې له خورا ښه امنيتي او مالي ثبات څخه برخمن شوی دی.
هغې زياته کړې، چې افغانستان کې دا مهال د اوسني حکومت پر وړاندې هېڅ د پام وړ وسلهواله یا سیاسي ننګونه شتون نه لري؛ او دا موضوع د افغان حکومت له مهمو لاسته راوړنو څخه ګڼل کېږي.
ګانیون ويلي، «د افغانستان اوږدمهاله راتلونکی تر ډېره د اوسني حاکميت په جوړښت او کورني ثبات پورې تړلی دی» او په خبره یې هغه څه چې اوس لیدل کېږي، « پر ټول افغانستان د اوسني حکومت د کنټرول زیاتوالی دی.»
يادې غونډې ته د روسیې، چين او يو شمېر نورو هېوادونو استازو افغانستان سره پر تعامل ټينګار کړی.