په قرغیزستان کې افغان سفارت سرپرست مولوي عبدالشکور حقاني، د قرغیزستان د بهرنیو چارو وزارت د څلورمې سیاسي څانګې له رئيس، ميربېک باکیتوویچ سره کتلي.
قرغیزستان کې د افغانستان سفارت ویلي، چې په دې لیدنه کې د کابل او بشکیک ترمنځ د دوه اړخیزو سیاسي، اقتصادي او فرهنګي همکاریو پر پیاوړتیا او د سوداګرۍ او ټرانزیټ پر پراختیا خبرې شوې دي.
ښاغلي حقاني په خپلو خبرو کې د دوه اړخیزو سوداګريزو اړیکو د پراختیا په برخه کې افغان سوداګرو او موټر چلوونکو ته د ویزو په ورکړه ټینګار کړی.
په ورته مهال قرغیزستاني لوري د دواړو هېوادونو ترمنځ د اړیکو د لا پراختیا او له افغانستان سره یې د اقتصادي، سوداګریزو او بشردوستانه همکاریو ډاډ ورکړی دی.