د ټایمز اف انډیا راپور ورکړی، چې په لندن کې زرګونو کشمیریانو او د بشري حقونو فعالانو د پاکستان عالي کمېسیون مخې ته لاریون کړی او د پاکستان پوځي رژیم تر ادارې لاندې جمو او کشمیر سیمو کې یې د بشري حقونو د سرغړونو، نیونو او سیاسي فشارونو پر ضد غږ پورته کړی.
د تایمز اف انډیا د راپور له مخې، لاریون کوونکو د پاکستان پوځي رژیم پر ضد شعارونه ورکړي او ادعا یې کړې چې په جمو او کشمیر کې د سیاسي فعالانو پر ضد سخت اقدامات روان دي، چې پکې نیونې، ځورونې او د بیان د آزادۍ محدودیتونه شامل دي.
په دې لاریون کې ګډونوالو د نیول شویو سیاسي فعالانو د فوري خوشې کېدو غوښتنه کړې او له نړیوالې ټولنې یې غوښتي، چې د دغو ادعا شویو سرغړونو په اړه جدي پاملرنه وکړي. راپور زیاتوي، چې دا لاریون د کشمیري ډیاسپورا د هغو پراخو اعتراضونو یوه برخه ده، چې د وروستیو میاشتو په جریان کې په اروپا او نورو هېوادونو کې زیات شوي دي.
راپور کې دا هم راغلي، چې لاریون کوونکو د پاکستان پوځي رژیم هغه اقدامات هم وغندل، چې د دوی په وینا د سیاسي مخالفینو غږونه خاموشوي او د سیمې د بشري حقونو وضعیت یې نور هم کړکېچن کړی دی.