د افغانستان برېښنا شرکت وایي، چې روسي پانګهوالو په هېواد کې د حرارتي، ګازو او ډبرو سکرو له لارې د برېښنا تولید فابریکو د جوړولو او بیا رغونې په برخه کې د پانګونې لېوالتیا څرګنده کړې ده.
د افغانستان برېښنا شرکت د خبرپاڼې له مخې، د برېښنا شرکت عمومي اجرائیوي رئیس ملا عبدالحق همکار له څلورو روسي کمپنیو سره په ناسته کې د موجوده فابریکو د عصري کولو، د ظرفیت لوړولو او د نوو توربینونو د نصب پر موضوعاتو خبرې کړې دي.
روسي لوري هم د ډبرو سکرو پر بنسټ د عصري ټکنالوژۍ په کارولو سره د برېښنا او تودوخې د ګډ تولید او فابریکو د تخنیکي بیا رغونې په اړه خپل وړاندیزونه وړاندې کړي دي.
خبرپاڼه زیاتوي، دواړو لوریو پرېکړه کړې، چې روسي پانګهوال به د برېښنا شرکت له اړوندو ریاستونو سره په ګډه خپلې لومړنۍ تخنیکي ارزونې پيل کړي.