بروکسل ته د افغان حکومت د تخنیکي پلاوي وروستی سفر او د کډوالۍ او قونسلي خدماتو په اړه د اروپایي هېوادونو له استازو سره مستقیم بحثونه، د افغانستان د فعالې ډیپلوماسۍ او رغنده اړیکو لپاره یو نوی پړاو دی. دې ناستې په ډاګه کړه چې نړیوال سیاست په تدریجي ډول پر احساساتو او تبلیغاتو د اتکاء پر ځای، د واقعیت پالنې لور ته روان دی. دا چې د اروپا په زړه کې د افغانستان د حکومت استازي په رسمي توګه د بحث مېز ته دعوت کېږي، نو دا پیغام ورکوي چې د افغانستان شته واقعیت او واکمني نور د انکار وړ نه ده او د سیمې او نړۍ د ثبات لپاره له دغه حکومت سره خبرې اترې یوازینۍ منطقي لاره ده.
خو د دغه ډیپلوماټیک پرمختګ په لیدو، هغو مخالفو کړیو چې په تېرو څو کلونو کې یې خپله بقا یوازې د افغانستان په انزوا او د ولس په بدبختۍ کې لیدله، سخته وارخطایي او ذهني ناارامي خپره کړې ده. د دوی لخوا په اروپا کې د سرک پر غاړه لاریونونه او غوغا، د کوم انساني یا ملي درد له امله نه دي، بلکې د هغې سختې وېرې زېږنده دي چې ګواکې د افغانستان او اروپا په نږدې کېدو سره به د دوی د پناه غوښتنې بهانې، د پروژو تمویل او په بهر کې د اوسېدو لوکس ځایونه له لاسه ووځي. دوی چې کلونه کلونه یې په دروغجنو تبلیغاتو پانګونه کړې وه، اوس د خپل سیاسي هویت د ورک کېدو په ماتم ناست دي.
دغو تش په نامه منتقدینو د ډېر وخت لپاره هڅه وکړه چې نړیوالو ته د افغانستان یو داسې انځور وړاندې کړي چې ګواکې له نوي حکومت سره تعامل ښې پایلې نه لري؛ خو بروکسل ته د افغان پلاوي سفر د مخالفینو د دروغجنو تبلیغاتو تلسیم مات کړ. کله چې کوربه هېوادونه د تبلیغاتو او احساساتي شعارونو پر ځای، د منطق او حل لارو وړاندیزونه مني، نو په خپله د مخالفو څېرو د پروپاګند بازار بې اثره او د اړیکو د خرابولو هڅې په اوبو لاهو کېږي.
د نننۍ نړۍ ټول هېوادونه یو بل ته اړتیا لري، هېڅوک نه شي کولای د یو څو ماتې خوړلیو او شړل شویو کسانو په خوله د افغانستان په څېر یو ستراتیژیک هېواد په انزوا کې وساتي. د دغه نړیوال کلي اصول غوښتنه کوي چې د تقابل او زړو ناکامو تجربو پر ځای، د تفاهم او ګډ کار لار غوره شي.
په ټوله اروپا کې مېشت په سلګونو زره بې چاره افغانان د خپلو لومړنیو او انساني حقونو لکه پاسپورټونو او نورو اسنادو د تمدید او تائیدۍ په برخه کې له سختو کړاوونو سره مخ دي. د دغو هېوادوالو حقوقي ستونزې قونسلي خدماتو ته جدي اړتیا لري، چې دا د هغوی یو بنسټیز حق دی او نه باید د څو کسانو د شومو سیاسي ګټو قرباني شي. د دغو مخالفینو تر ټولو لویه جفا همدا ده چې د خپلو امتیازاتو لپاره د زرګونو افغان کډوالو پر ستونزو سترګې پټوي؛ خو د بروکسل ناستې ثابته کړه چې د دغو ستونزو حل یوازې له رسمي او حقیقي اړخونو سره په مستقیمه مفاهمه کې دی.
د نړۍ له نورو هېوادونو سره هم په ډیپلوماټیکو برخو کې پرمختګونه دا حقیقت روښانه کوي چې د بندیزونو او منفي تبلیغاتو تګلارې نور ځای نه لري او راتلونکی د رغنده اړیکو، متقابل احترام او د خلکو د ستونزو د درک په اساس دی. نور نو د افغان حکومت او خاورې د دښمنانو افواهات، تبلیغات او هڅې بې اثره، ناکامې او شرمنده دي او نړیواله ټولنه یې له پامه غورځوي.
یادؤنه: په هندوکشغږ کې نشر شوې لیکنې، مقالې او تبصرې یواځې د لیکوالانو نظر څرګندوي، د هندوکشغږ توافق ورسره شرط نه دی.