په قطر کې د افغان حکومت سفیر، محمد سهیل شاهین، د کډوالو په چارو کې د ملګرو ملتونو د عالي کمېشنرۍ (UNHCR) له عالي کمېشنر ډاکټر برهم صالح سره په دوحه کې د راستنېدونکو افغان کډوالو پر ستونزو خبرې کړي دي.
د خبرپاڼې له مخې، په دې لیدنه کې له پاکستان او ایران څخه د راستنېدونکو افغان کډوالو لپاره د سرپناه، روغتیايي او ښوونیزو خدمتونو د برابرولو، د کاري فرصتونو د رامنځته کولو او د هغوی د لومړنیو اړتیاوو د پوره کولو په اړه خبرې شوې دي.
همدارنګه، دواړو لورو د هغو شکایتونو او ستونزو په اړه هم بحث کړی، چې له مخې یې د یو شمېر افغان کډوالو شتمنۍ او املاک په غیرقانوني او جبري ډول اخیستل شوي دي. په دې کتنه کې ټینګار شوی، چې یادې شتمنۍ باید خپلو اصلي مالکانو ته بېرته وسپارل شي.
د خبرپاڼې له مخې، ډاکټر برهم صالح ویلي، چې د افغان کډوالو له ستونزو خبر دی او د حل لپاره به یې لازمې هڅې وکړي.