د ایران تسنیم خبري اژانس د سپاه پاسداران له قوله راپور ورکړی، چې د امریکا د بریدونو په ځواب کې یې د کوېټ په احمد الجابر هوايي اډه کې د اوږد واټن توغندیو یو رادار، یو مخابراتي مرکز، د سپوږمکۍ مخابراتي سیسټمونه او د MQ-9 بېپیلوټه الوتکو د ساتنې هنګر په نښه او له منځه وړي دي.
سپاه پاسداران په یوه بله اعلامیه کې ادعا کړې، چې د امریکا د رادارونو او هوايي دفاعي سیسټمونو لپاره یې «توره شپه» رامنځته کړې ده.
د سپاه په خبره، د احمد الجابر هوايي اډې د لومړني خبرداري رادار، د توغندیز دفاع رادار، د FPS-117 رادار، د پاتریوت هوايي دفاع سیسټم او د هوايي دفاع اړوند د سپوږمکۍ مخابراتي سیسټمونه یې هم په نښه کړي دي.
بل لور ته، د امریکا مرکزي قوماندانۍ (سنټکام) ویلي، چې د جولای په ۲۰مه یې د پرلهپسې لسمې ورځې لپاره پر ایران بریدونه ترسره کړي دي.
د سنټکام په وینا، په دغو عملیاتو کې د ایران پوځي قومندانۍ، سمندري پوځي وړتیاوې، د توغندیو او بېپیلوټه الوتکو د توغولو مرکزونه او د هوايي دفاع سیسټمونه په نښه شوي، څو د هرمز تنګي له لارې پر سوداګریزو بېړیو د ایران د بریدونو وړتیا کمه شي.
سنټکام ټینګار کړی، چې ځواکونه یې لا هم چمتو دي او د ملکي سمندري بېړیو پر وړاندې هر ډول برید ته به سخت ځواب ورکړي.