د ۲۰۱ خالد بن ولید قول اردو ویاند وحیدالله محمدي وايي، چې د نورستان ولایت په مرکز پارون کې د وروستیو سختو اورښتونو له امله سېلابونه راوتلي، چې خلکو ته یې ځاني او مالي زیانونه اړولي دي.
نوموړي ویلي، چې د یادې قول اردو ځواکونه له نورو امنیتي ارګانونو سره په همغږۍ د ژغورنې او مرستې رسولو په عملیاتو بوخت دي.
د هغه په وینا، د قول اردو د رهبرۍ پر سپارښتنه ختیځ زون ته تازه دمي ځواکونه استول شوي او د سېلاب ځپلو لپاره خوراکي توکي هم چمتو شوي، چې سیمې ته له رسېدو سره سم به پر اړمنو کورنیو ووېشل شي.
بلخوا د نورستان د والي ویاند فریدون صمیم د پارون سېلابونو د وروستیو جزئیاتو په اړه ویلي، چې تر اوسه ۱۰۵ کسان نادرکه دي او ۱۱ جسدونه موندل شوي او خلکو ته د سېلابونو له امله شاوخوا ۳۵ میلیونه ډالره مالي زیان اوښتی دی.
تر اوسه د مرګ ژوبلې او زیانونو ورکړل شوي ارقام لا هم لومړني دي او د ژغورنې او ارزونې د دوام له امله ښايي بدلون ومومي.