د ايران خاتم الانبیا قرارګاه تېره شپه، د ټرمپ وروستيو ګواښونو ته غبرګون کې ويلي، چې که د امریکا «تېری کوونکی» او «ترورېست» پوځ په پیکاکاس غره برید وکړي، نو دوی به دا په سیمه کې د جګړې پراخېدل وګڼي او د دغه هېواد ټولې ګټې، متحدین او ملاتړي به هدف وګرځوي.
ډونالد ترامپ پرون ګواښ کړی و، چې امریکا به ژر په ایران کې د پیکاکاس تر ځمکې لاندې اټومي تاسیسات د بريد موخه وګرځوي.
په ورته مهال، د امریکا مرکزي قومنداني، ويلي د ایران پر پوځي اهدافو د پرله پسې یوولسمې شپې بريدونه یې هم ترسره کړي دي.
امريکا ويلي، دا بريدونه د دې لپاره طرح شوي، چې په هرمز تنګي کې سوداګریزو کښتیو ته د ګواښ پېښولو په برخه کې د ایران وړتیا نوره هم کمه کړي.
په ورته وخت کې ايراني رسنيو راپور ورکړی، چې تېره شپه د امریکا د بريدونو په پايله کې تهران، بوشهر، ماهشهر، امیدیه، سیریک او څو نورو سیمو کې د چاودنو غږونه اورېدل شوي دي.