د ایران د بهرنیو چارو وزیر عباس عراقچي ویلي، هېواد یې افغانانو ته د ویزو د صادرولو په برخه کې هېڅ خنډ نه لري او د بهرنیو چارو وزارت چمتو دی چې په دې برخه کې همکاري وکړي.
عراقچي د خراسان رضوي ولایت له چارواکو سره په یوه غونډه کې ویلي، د سرحدي ولایتونو ستونزې په سیمهییزه کچه او د افغانستان له سرحدي ولایتونو سره د اړیکو له لارې په ښه توګه حل کېدای شي او د کابل او تهران ترمنځ خبرو ته اړتیا نشته.
هغه د افغانستان، پاکستان او ترکمنستان په یادولو سره ویلي، د ایران ګاونډي هېوادونه د بندیزونو په شرایطو کې د دغه هېواد له مهمو اقتصادي ظرفیتونو څخه شمېرل کېږي.
د ایران د بهرنیو چارو وزیر زیاته کړې، خراسان رضوي ولایت واک لري چې له ګاونډیو هېوادونو سره خپلې سوداګریزې اړیکې او د خلکو تګ راتګ لا پراخ کړي.