تسنیم خبري اژانس راپور ورکړی، چې د حماس غورځنګ پلاوي په قاهره کې له منځګړو او د غزې د اوربند له تضمین کوونکو سره په خبرو کې د غزې د سولې پلان د دویم پړاو له نقشې سره مشروطه موافقه کړې ده.
حماس ویلي، دا موافقه د فلسطیني ولس د ګټو د خوندي کولو او د دایمي اوربند د ترلاسه کولو په هدف شوې، خو د عملي کېدو لپاره یې پر یو شمېر مهمو شرطونو ټینګار کړی دی.
د حماس د شرایطو له مخې، د غزې له تړانګې څخه د اسرائیلي ځواکونو بشپړ وتل، د بشري مرستو سمدستي او دوامدار تأمین، په غزه کې د اداري کمېټې د فعالیت پیل او د بیارغونې بهیر پیلېدل د دې موافقې له مهمو غوښتنو څخه دي.
حماس ټینګار کړی، چې د دغو شرایطو عملي کېدل د دایمي اوربند او په غزه کې د سولې د ټینګښت لپاره اساسي دي.